Աստանայում հնարավոր է կայանա Սարգսյան-Պուտին հանդիպումը

Հնարավոր է` մայիսի 31-ին Աստանայում հանդիպեն Հայաստանի և Ռուսաստանի նախագահներ Սերժ Սարգսյանն ու Վլադիմիր Պուտինը:  verelq.am-ի հաղորդմամբ՝ այս մասին Մոսկվայում մի խումբ հայ լրագրողների հետ հանդիպման ժամանակ ասել է ՌԴ ԱԳՆ ԱՊՀ-ի բաժնի տնօրեն Ալեքսեյ Պավլովսկին:

«Մայիսի 31-ին Աստանայում նախատեսված է Եվրասիական տնտեսական միության անդամ պետությունների ղեկավարների հերթական հանդիպումը, և չի բացառվում, որ դրա շրջանակում տեղի ունենա նաև Սերժ Սարգսյանի և Վլադիմիր Պուտինի հանդիպումը»,- ասել է նա:

Անդրադառնալով հայ-ռուսական հարաբերություններին` Պավլովսկին նշել է, որ դրանք գործընկերային են, մինչդեռ Ադրբեջանի հետ Ռուսաստանի հարաբերությունները բնութագրվում են ինչպես ռազմավարական համագործակցություն:

«Գործընկերությունը նշանակում է փոխգործակցություն, ռազմավարականը նշանակում է, որ փոխգործակցությունը երկարատև բնույթ ունի` օբյեկտիվ հիմքով: Ռուս-ադրբեջանական փոխգործակցության օբյեկտիվ հիմքերը հասկանալի են` աշխարհագրական դիրքը, տնտեսական կապերը, Ռուսաստանում հսկայական ադրբեջանական սփյուռքի գոյությունը: Հենց դա ենք մենք կոչում ռազմավարական գործընկերություն: Բայց, անշուշտ, Ադրբեջանը չի հանդիսանում Ռուսաստանի այնպիսի գործընկերը, ինչպիսին Հայաստանն է»,- նշել է նա:

Մանրամասն՝ սկզբնաղբյուրում