Հայաստանը ցույց է տալիս, որ Արցախի ճանաչման հնարավորությունը չափազանց մեծ է. քաղաքագետ

Այս շաբաթ կառավարության նիստի օրակարգում ներառված է հարց Արցախի Հանրապետության ճանաչման մասին, որը մշակել են ԱԺ պատգամավորներ Զարուհի Փոստանջյանն ու Հրանտ Բագրատյանը:

Yerkir.am-ի հետ զրույցում, խոսելով այդ մասին, «Կովկաս» ինստիտուտի փոխտնօրեն, քաղաքագետ Սերգեյ Մինասյանը կարծիք հայտնեց, որ Հայաստանի իշխանությունները փորձում են քննարկել այդ փաստաթուղթը, իհարկե, դեռ չեն ճանաչելու, որովհետև դա մտնում է նախագահի այն հայտարարության տրամաբանության մեջ, որ եթե Ադրբեջանը սկսի լայնամասշտաբ պատերազմ, ապա Հայաստանը կճանաչի ԼՂՀ անկախությունը:

«Այս ամենի գլխավոր իմաստն է` Ադրբեջանին ցույց տալ, որ ռազմական գործողությունների վերսկսման դեպքում քաղաքական հետևանքներից մեկը կլինի ԼՂՀ ճանաչումը»,- ասաց նա:

Հարցին, թե կարո՞ղ է այդ հարցի ակտիվացումը զսպող դեր ունենալ Ադրբեջանի ռազմական նկրտումների համար, քաղաքագետը նշեց, որ ամեն ինչ կախված է այն հանգամանքից, թե ինչ հաշվարկներ ունի Ադրբեջանը:

«Բնական է, որ եթե Ադրբեջանի ղեկավարությունը, ռազմական ագրեսիայից բացի, այլ նպատակներ չունի, դժվար թե որևէ բան նրան զսպի, բացի պատերազմի գնից ու իր համար  ռազմական վատ հետևանքներից: Այս պահին Հայաստանը պարզապես ցանկանում է ցույց տալ, որ Արցախի ճանաչման հնարավորությունը չափազանց մեծ է, և Ադրբեջանը պետք է փորձի զգուշավոր լինել իր հետագա քայլերում»,- ասաց Սերգեյ Մինասյանը: