Թալինում քաղաքացին ընտրության է եկել տեխզննման կտրոնով. Լուսանկարներ

Ինչպես արդեն տեղեկացրել էինք, այսօր ՀՀ 8 մարզերում ՏԻՄ ընտրություններ են:

Հանրապետության 3 քաղաքում, այդ թվում` Թալինում քաղաքապետի ընտրություններ են: Ինչպես հայտնում է Yerkir.am-ի լրագրողը, քաղաքում գործող 3 ընտրատեղամասերում առավոտից ընտրողների ակտիվություն է նկատվում: Կենտրոնական ընտրատեղամասում, որն ունի 1864 ընտրող, արդեն ընտրել է մոտ 10 տոկոսը:

Yerkir.am-ի հետ զրույցում «Թրանսփարենսի ինթերնեյշնլ» հակակոռուպցիոն կենտրոնի ներկայացուցիչ Նաիրա Գրիգորյանը հայտնեց, որ այս պահի դրությամբ կոպիտ խախտումներ չեն արձանագրվել, որոշակի թերություններ են գրանցվել` պայմանավորված հանձնաժողովի անդամների տեղեկացվածության պակասով: Մասնավորապես, ըստ նրա` հանձնաժողովի նախագահը, ով քաղաքապետարանի պաշտոնյա է, չի կարողանում պատշաճ կերպով վերահսկել, որպեսզի կուտակումներ չլինեն տեղամասում, եւ ընտրությունները կատարվեն օրենքին համապատասխան: Նա նշեց, որ հանձնաժողովի անդամներից մեկը առանց ուշադիր նայելու մարդկանց անձնագիրը  եւ ծրարները, կնքում է դրանք. օրինակ` տեխզննման կտրոնը շփոթել է նույնականացման քարտի  հետ եւ փորձել վրան կնիք դնել, ինչը կանխել են դիտորդները: 

Քաղաքապետի թեկնածուները երեքն են՝ ՀՅԴ-ի թեկնածու Տիգրան Հարությունյանը, գործող քաղաքապետ, ՀՀԿ-ական Սարգիս Արամյանը, «Հայկական վերածնունդ» (ՕԵԿ) կուսակցության ներկայացուցիչ Գուրգեն Գրիգորյանը։