Ռամազոտիի հայաստանյան համերգը պաշտոնապես չեղյալ հայտարարվեց. պարզաբանում

Տեղեկացրել էինք, որ Էրոս Ռամազոտին չեղյալ է հայտարարել իր համերգները Հայաստանում, Ռուսաստանում և Էստոնիայում: Երգչի հայաստանյան համերգի կազմակերպիչը Forpostart Production-ն է: Ընկերության գլխավոր տնօրեն  Զառա Մխեյանը հայտարարություն է տարածել, որը ներկայացնում ենք ստորև:

««Trident Music Srl պրոդյուսերական ընկերությունը, որը Էրոս Ռամազոտտիի՝ 2015-2016 թվականների համաշխարհային համերգային շրջագայության կազմակերպիչն է, խորապես ցավում է, որ ս/թ մարտի 26-ին Մինսկում կայացած համերգից հետո ստիպված է հայտարարել, որ դադարեցվում են Էրոս Ռամազոտտիի Էստոնիայում, Ռուսաստանում և Հայաստանում կայանալիք համերգային շոուները՝ նշված երկրներում շրջագայության ռուսաստանյան կազմակերպիչ Global Communications ընկերության կողմից պայմանագրային պարտավորությունների խախտման պատճառով: Global Communications ընկերության (ՀՎՀՀ 7704858856) ղեկավարն է Անդրեյ Նիկոլայի Ագապովը:

Global Communications-ը բազմիցս խախտել է պայմանագրով ամրագրված ֆինանսական պարտավորությունները, ներառյալ` Էրոս Ռամազոտտիի համերգային շոուն միջազգային բարձր մակարդակով կազմակերպելուն ուղղված դրամական միջոցների վճարումը Trident Music Srl պրոդյուսերական ընկերությանը:

Զուր էին նախապես հաստատված գները և վճարումների ժամկետները վերանայելու շուրջ Global Communications-ի խնդրանքները բավարարելու Trident Music Srl-ի փորձերը՝ հուսալով, որ, ի վերջո, Global Communications-ը կկատարի իր պարտավորությունները:

Մենք սպասում էինք մինչև վերջին պահը, քանի դեռ հնարավոր կլիներ ապահովել բարձրակարգ շոուի կազմակերպումը, ինչպես որ նախատեսված էր, սակայն մինչ այժմ չենք ստացել կայանալիք շոուների կազմակերպմանն ուղղված վճարները:

Հաշվի առնելով վերոգրյալը, ինչպես նաև Global Communications-ի կողմից պայմանագրային դրույթների այլ խախտումները, մենք ստիպված ենք չեղյալ հայտարարել շոուն և խզել պայմանագիրը Global Communications ընկերության հետ:

Trident Music Srl-ը իրավունք ունի դիմելու դատարան՝ Global Communications-ի դեմ հայցով և պահանջել կրած խոշոր չափի վնասի փոխհատուցում: Trident Music Srl-ը շոուի կայացման համար ձեռնարկած առավելագույն ջանքերի հետ մեկտեղ, այնուամենայնիվ հայցում է Էրոս Ռամազոտտի երկրպագուների և բոլոր այն մարդկանց ներողամտությունը, ում անհարմարություններ է պատճառել այս տհաճ և անհավանական իրավիճակը:

FORPOSTART PRODUCTION-ը բանակցություններ էր վարում Trident Music Srl-ի հետ՝ ի դեմս Մաուրիցիո Սալվադորիի, ով պատրաստ էր գնալ զիջումների և սպասել ևս 2 օր՝ ստեղծված իրավիճակում երևանյան շոուի կազմակերպման հնարավորության հարցը հստակեցնելու համար: Մենք դիմեցինք մի քանի հայ գործարարների՝ համերգը փրկելու ակնկալիքով, սակայն դրական պատասխան չստացանք: Եվ արդյունքում, Էրոս Ռամազոտտի երևանյան համերգը վերջնականապես չեղյալ է հայտարարվում՝ համաձայն Trident Music Srl-ի որոշման:

Global Communications-ի ղեկավար Ա. Ագապովը չի պատասխանում մեր հեռախոսազանգերին: Մենք պաշտոնական հարցումով դիմել ենք Global Communications -ին և սպասում ենք պատասխանի: Այս պահի դրությամբ ոչ մի արձագանք չկա: Մենք ճիշտ համարեցինք դադարեցնել տոմսերի վաճառքը, չնայած նրան, որ ոչ մի պաշտոնական ծանուցում չենք ստացել, բացառությամբ՝ երևանյան համերգը չեղարկելու մասին Trident Music Srl-ի ղեկավարի հնչեցրած որոշման:

FORPOSTART PRODUCTION և Global Communications ընկերությունների միջև կնքվել է գործակալական պայմանագիր, որի համաձայն FORPOSTART PRODUCTION-ը հանդիսանում է Երևանում Էրոս Ռամազոտտի համերգի կազմակերպման գործընթացի տեխնիկական կատարողը, իսկ Global Communications-ը՝ ի դեմս Անդրեյ Ագապովի, պատվիրատուն: Նախապատրաստական աշխատանքների 6 ամիսների ընթացքում Global Communications-ը բազմիցս խախտել է FORPOSTART PRODUCTION-ի նկատմամբ իր պարտավորությունները՝ կապված Էրոս Ռամազոտտի շոուի անցկացման ծախսերի վճարումների հետ (երևանյան ենթագործակալների՝ երրորդ անձանց վճարումները):

Սակայն, FORPOSTART PRODUCTION-ը և նրա երևանյան ներկայացուցիչ «Շոուսթար» ընկերությունը մշտապես գնացել են զիջումների և ինքնուրույն են լուծել կապալառուների հետ ծագած ֆինանսական հարցերը (FORPOSTART PRODUCTION և Global Communications ընկերությունների միջև կնքված գործակալական պայմանագրի համաձայն, գործակալը, այսինքն FORPOSTART PRODUCTION-ը իրավունք ունի միջոցառման տոմսերի իրացման համախառն հասույթից, ներկայացված հաշիվների և կապալի պայմանագրի հիման վրա կատարել վճարումներ կապալառուին՝ Միջոցառման կազմակերպման և անցկացման ծախսերի նախահաշվի գումարների սահմաններում):

«5.5 Գործակալն իրավունք ունի սույն պայմանագրի շրջանակներում իր ստանձնած պարտավորությունների իրականացման համար անհրաժեշտ ծառայություններ մատուցող ենթագործակալների հետ` Պրինցիպալի հետ նախնական համաձայնեցմամբ կնքված պայմանագրերով վճարումներ կատարել Միջոցառման տոմսերի իրացման համախառն հասույթից, Միջոցառման անցկացման համար անհրաժեշտ ծախսերի նախահաշվի սահմաններում (Հավելված 4), միայն Պրինցիպալին նախապես ծանուցելով` համաձայն ներկայացված հաշիվների և ենթագործակալների հետ կնքված պայմանագրերի»:

Նույն պայմանագրում առանձին կետով սահմանվում է, որ Global Communications-ի կամ Արտիստի մեղքով Միջոցառման չեղարկման դեպքում Գործակալը որևէ պատասխանատվություն չի կրում հնարավոր վնասները հատուցելու հարցում, բոլոր պահանջները ներկայացվում են Պատվիրատուին, այսինքն Global Communications-ին:

«7.15 Պրինցիպալի կամ Արտիստի մեղքով Միջոցառման` չեղյալ հայտարարվելու դեպքում Գործակալը չի կրում Պրինցիպալի կրած վնասների փոխհատուցման որևէ պարտավորություն, իսկ հետագայում ազատվում է սույն պայմանագրով ստանձնած պարտավորությունների կապակցությամբ ցանկացած պատասխանատվությունից:

Միջոցառման` ոչ Գործակալի մեղքով չեղյալ հայտարարվելու դեպքում իրացված տոմսերի ետ վերադարձի դիմաց դրամական փոխհատուցման պարտավորությունը կրում է Պրինցիպալը` համաձայն կողմերի կողմից կնքված ծախսերի համաձայնեցման ակտի և սույն պայմանագրի լրացուցիչ համաձայնագրի պայմանների»:

Վերոգրյալի հիման վրա տեղեկացնում ենք բոլոր «Ենթագործակալներին» Միջոցառման տոմսերի վաճառքը դադարեցնելու մասին: Լրացուցիչ հայտնում ենք, որ տոմսերը և դրանց վաճառքից գոյացած ամբողջ հասույթը հանդիսանում է Global Communications ընկերության սեփականությունը:

«4.9 Իրացված տոմսերը համարվում են Պրինցիպալի սեփականությունը: Հաճախորդի/հանդիսատեսի կողմից տոմսերի ձեռքբերման պահից բոլոր իրավունքները և պարտականությունները ծագում են հանդիսատեսի և Պրինցիպալի միջև»:

Բնակչության դրամական միջոցների փոխհատուցումը (ոչ գործակալի մեղքով չեղարկված Միջոցառման տոմսերի վերադարձը) իրականացվում է Պատվիրատուի կողմից, ինչի կապակցությամբ էլ, FORPOSTART PRODUCTION-ը, որ նույնպես հանդիսանում է տուժող կողմ, ամենասեղմ ժամկետներում կպատրաստի բոլոր անհրաժեշտ փաստաթղթերը և Global Communications ընկերության դեմ դատական ատյաններին հայցադիմում կներկայացնի:

Հայցադիմումով մենք պահանջելու են ֆինանսական վնասի, բաց թողնված օգուտի, տուժանքների (տուգանքների, գանգատների, երրորդ անձանց պահանջների և բողոքների հատուցում), ինչպես նաև բարոյական վնասի և մեր ընկերության բարի համբավին հասցված վնասի փոխահատուցում:

Լրացուցիչ ուզում եմ տեղեկացնել, որ Բաքվում ս/թ ապրիլի 28-ին նախատեսված Էր Ռամազոտտի համերգը՝ կապված վերը նշված կոնֆլիկտի հետ (Global Communications-ի և Trident Music Srl-ի միջև), նույնպես չեղյալ էր հայտարարվել: Սակայն, Հեյդար Ալիևի ֆոնդի ֆինանսական օժանդակությամբ այն Բաքվում կկայանա, այս պահի դրությամբ՝ ապրիլի 27-ին:

Վրաստանում ևս, իրենց մշակույթի նախարարության աջակցությամբ, ինքնուրույն լուծել են իրենց ֆինանսական խնդիրները Trident Music Srl-ի հետ և այս պահի դրությամբ Է. Ռամազոտտի համերգը Թբիլիսիում կկայանա ապրիլի 24-ին:

Ֆորպոստարտ Պրոդաքշըն ընկերության գլխավոր տնօրեն` Զառա Մխեյան»: