Աճեմյանցիների ձայնը լսող եղավ` տնօրենի մրցույթը չեղյալ հայտարարվեց

Տեղեկացրել էինք, որ վաղը Գյումրիի Վ. Աճեմյանի անվան պետական դրամատիկական թատրոնում տնօրենի ընտրություն է լինելու. լրացել է թատրոնի տնօրենի` Գևորգ Խաչատրյանի լիազորությունների ժամկետը /8 տարի/:  Որպես տնօրենի թեկնածու` առաջադրվել է 2  ՀՀԿ-ական` «Ցայգ» հեռուստաընկերության տնօրեն Մարգարիտա Մինասյանը և նույն հեռուստաընկերության աշխատակից Արաքս Կիրակոսյանը:

Թատրոնի անձնակազմը դեմ էր այդ թեկնածուների առաջադրմանը, իսկ պատճառը մեկն է` նրանք մասնագիտական կրթություն չունեն:

Yerkir.am-ին ՀՀ մշակույթի նախարարությունից տեղեկացրեցին, որ մրցույթը չի կայանալու, քանի որ իր թեկնածությունն առաջադրած կանանցից մեկն այսօր իր փաստաթղթերը հետ է վերցրել, իսկ մեկ թեկնածուի դեպքում մրցույթը չի կարող կյանքի կոչվել, քանի որ չի ապահովվի մրցակցության գաղափարը: 

Հիշեցնենք, որ այսօր թատրոնի դերասանները, ռեժիսորը, գեղարվեստական խորհրդականը հանդես էին եկել մամուլի ասուլիսով և նշել, որ մշակույթի նախարար Հասմիկ Պողոսյանը խոստացել է չանտեսել իրենց խնդրանքը և մրցույթը չեղյալ հայտարարել: