Անցած տարվա փողերը վերադարձրեք, հիշեցնում եմ. Հովիկ Աբրահամյանը՝ Մարտին Սարգսյանին

Այսօր կառավարության նիստում վարչապետ Հովիկ Աբրահամյանը անսպասելի խիստ գտնվեց անշարժ գույքի կադաստրի պետական կոմիտեի նախագահ Մարտին Սարգսյանի հանդեպ:

Երբ Մարտին Սարգսյանը ներկայացրեց իր ղեկավարած կառույցի զարգացման` 2016 թվականի համալիր ծրագիրը հաստատելու մասին նախագիծը, վարչապետը հետաքրքրվեց, թե կադաստրի պետական կոմիտեն նախորդ տարի բյուջեն որքանո՞վ է թերակատարել: «Մոտ 12 տոկոսով»,- ասաց Մարտին Սարգսյանը:

«Հիմա դուք 4 մլրդ 304 մլն դրամ որ պլանավորել եք, բա որ չհավաքագրեք էդ գումարները, ի՞նչ ենք անելու: Կառավարությունից ակնկալիք չունենաք»,- ասաց վարչապետը:

Մարտին Սարգսյանը նշեց, որ եթե չկարողանան հավաքագրել, առաջնային խնդիրները կլուծեն, հետո նոր կանցնեն առաջ: Երբ գումարները հավաքագրվեն, նոր բոլոր ծրագրերը կիրականացնեն:

«Հետո մի\' մոռացեք, որ անցած տարվա փողերը վերցրել եք` հետ վերադարձնելու պայմանով: Հիշեցնեմ ձեզ էլի, ձեզ վնաս է, որ հիշեք, բայց ես հիշեցնեմ ձեզ ևս մեկ անգամ»,- ասաց վարչապետը: