Թուրքիան ռմբակոծել է Իրաքի հյուսիսի քրդական ռազմաբազաները

Մայրաքաղաք Անկարայում մարտի 13-ի երեկոյան տեղի ունեցած ահաբեկչությունից հետո Թուրքիայի զինված ուժերը ռմբակոծել Իրաքի քրդական թիրախները. տեղեկացնում է Ermenihaber-ը:

Թուրքական Sondakika.com լրատվակայքի տեղեկացմամբ՝ թուրքական կողմից ռմբակոծվել են Իրաքի հյուսիսում տեղակայված` Քուրդիստանի բանվորական կուսակցության (ՔԲԿ-PKK) ճամբարները:

Զինված ուժերի գլխավոր շտաբը մարտի 13-ի լույս 14-ի գիշերը՝ 03.20-ից 05.30-ի սահմաններում, F 16 և F4 2020 ռազմական ինքնաթիռներով ռազմաօդային գործողություն է իրականացրել Քանդիլ և Գարա շրջաններում գտնվող` PKK-ի ռազմամթերքի պահեստների ու ապաստարանների ուղղությամբ: Նշվում է, որ Քանդիլում և Գարայում տեղակայված 18 թիրախները 30 անգամ ռմբակոծվել են և ամբողջությամբ ոչնչացվել: