Թուրքիայի Սուր շրջանում մերկացնում են տղամարդկանց, ապա` կտտանքների ենթարկում

Ներկայիս Թուրքիայի տարածքում գտնվող հայկական Տիգրանակերտ նահանգի Սուր շրջանում քաղաքացիների նկատմամբ անմարդկային արարքները շարունակվում են:

Ըստ «Ակօս»-ի՝ համացանցում հայտնված լուսանկարները, որոնցում թուրք զինվորականները մերկացրել են տղամարդկանց՝ կտտանքների ենթարկելու նպատակով, մեծ աղմուկ են բարձրացրել երկրում:

Նահանգապետարանը հերքող հայտարարություն է տարածել` պնդելով, թե իբր երկուշաբթի «անվտանգության ծրագրեր» են իրականացրել, և դրանց շրջանակներում արված լուսանկարները անհայտ պատճառներով հայտնվել են համացանցում:

Ավելին՝ նահանգապետարանը լուսանկարների համար պատասխան տալու փոխարեն հետաքննություն սկսել «առանց թույլտվության լուսանկարողների և դրանք համացանցում տեղադրողների» դեմ:  

Հիշեցնենք, որ թուրք զինվորականները նման պահվածք էին ցուցաբերել նաև կանանց նկատմամբ. քուրդ կանանց սպանելուց հետո մերկացրել էին դիերն ու լուսանկարները տեղադրել համացանցում: