Կաշառակերությունը տղամարդկանց շրջանում ավելի բարձր է. Հրանտ Բագրատյան

Այսօր ԱԺ արտահերթ նիստում, երբ քննարկվում էր «Ժամանակավոր անաշխատունակության նպաստների մասին» օրենքի նախագիծը, ԱԺ պատգամավոր Հրանտ Բագրատյանը քննադատեց կառավարության գործելաոճը:

Նրա խոսքով` օրենքի այն դրույթը, ըստ որի` մեկ միլիոնից ավելի աշխատավարձ ստացող հղի կնոջ հղիության նպաստը պետք է վճարի նաև գործատուն, արդյունավետ քայլ չէ:

Ըստ Բագրատյանի` մեծ ընկերության սեփականատերերը չեն հասկանում՝ երեխա ունենալու համար ինչո՞ւ են իրենք վճարում: Նա նշեց, որ հայկական աշխատաշուկայում կանանց գործազրկությունն ավելի մեծ չէ, քան տղամարդկանցը, թեեւ հակառակն են պնդում:

«Այսինքն՝ նորմալ հիմնարկի պետը, եթե չի լինում ծննդաբերության հանգամանքը, գերադասում է կին աշխատողին: Շատ պարզ պատճառով՝ ավելի դիսցիպլինայով են և ձեռքից ավելի պինդ են: Միանշանակ, կաշառակերությունը տղամարդկանց մեջ ավելի բարձր է՝ որպես բիոլոգիական տեսակ: Բազմաթիվ հետազոտություններ կան այդ մասին: Հենց էսօր թարսի պես դիմեցին ինձ, առաջարկեցին մի շարք աշխատողներ և ասացի՝ կին չառաջարկեք, շատ պարզ պատճառով»,- ասաց պատգամավորը:

Քննարկումների ժամանակ անդրադարձ էր կատարվել նաև կենսաթոշակային կուտակային համակարգին: Հրանտ Բագրատյանը կառավարության անդամներին և պատգամավորներին կոչ արեց չհիշեցնել այդ համակարգի մասին:

«Էդ կուտակայինի պատճառով անցած տարի տեմպն իջավ 3.3 տոկոս, էս տարի իջնում է 3 տոկոս, անցած տարի 20 մլրդ դուրս գնաց, էս տարի՝ 13 մլրդ: Եթե մի հրաշքով պարզվի, որ դուք իրավացի եք, դուք ձեր իրավացիությունը կարող եք առաջարկել 45 տարի հետո: Ես իմ իրավացիությունն արդեն ապացուցում եմ մեկ տարի հետ, երբ որ ասում եմ՝ տեսա՞ք` ինչ եղավ, այդպես չէր կարելի անել: Խնդրում եմ, դուք էդ թեմային ընդհանրապես մի' անդրադարձեք, որովհետև էդ թեման կարճ միացում է տալիս անմիջապես»,- ընդգծեց նա: