Նորամարգում կատարված սպանության գործով կասկածյալները բերման են ենթարկվել

Տեղեկացրել էինք, որ ոստիկանության Արտաշատի բաժնի կողմից, որպես անհայտ կորած, որոնվում էր Արարատի մարզի Ջրաշեն գյուղի բնակիչ` 1982 թ. ծնված Գարիկ Հուսիկի Արզունյանը, որը փետրվարի 11-ին դուրս էր եկել տնից, և նրա գտնվելու վայրն անհայտ էր: Փետրվարի 22-ին` ժամը 22.30-ին, ոստիկանության Մասիսի բաժնում ահազանգ էր ստացվել, որ Արարատի մարզի Նորամարգ գյուղի վերջնամասում գտնվող ջրատարում այրված դիակ կա:

Yerkir.am-ը ՀՀ ոստիկանությունից տեղեկացավ, որ ձեռնարկված միջոցառումների արդյունքում պարզվել է, որ հայտնաբերվածը Գ. Արզունյանի դին է: Պարզվել է նաև, որ Գ. Արզունյանին սպանել և դին այրել են: Հանցագործությունը բացահայտվել է: Սպանությունը կատարելու կասկածանքով կան բերման ենթարկվածներ: Քննությունը շարունակվում է: 

Հիշեցնենք, որ դեպքի առթիվ ՀՀ քննչական կոմիտեի Արարատի մարզային քննչական վարչության Մասիսի քննչական բաժնում փետրվարի 23-ին հարուցվել է քրեական գործ՝  ՀՀ քրեական օրենսգրքի 104-րդ հոդվածի 1-ին մասով (սպանություն):