Մենք երբեք չենք խուսափել պատասխանատվությունից ու աշխատանքից. Աղվան Վարդանյան

Այսօր ԱԺ-ում ՀՅԴ ԳՄ ներկայացուցիչ, ԱԺ ՀՅԴ խմբակցության քարտուղար Աղվան Վարդանյանը պատասխանել է լրագրողների մի քանի հարցերի:

- Պարո\'ն Վարդանյան, կիսո՞ւմ եք Արմեն Ռուստամյանի այն կարծիքը, որ իշխանությունները հեղինակազրկված են:

-Ես կարծում եմ, որ այս երկու-երեք օրվա աժիոտաժը ստեղծվել է հիմնականում լրագրողական համայնքի շնորհիվ, և կարծես երեկ ամեն ինչ իր հունի մեջ ընկավ: Եթե երեկ դուք հետևեիք Հանրապետական կուսակցության ներկայացուցիչների ելույթներին, ապա կտեսնեիք այլ բան: Ակնհայտ է, որ այդ բառը կոնտեքստից առանձնացվել է: Արմեն Ռուստամյանը երկրորդ անգամ է խոսել և ամեն բան տեղն է դրել: Ցանկացած իշխանություն, նույնիսկ` ամենաբարենպաստ երկրներում, ունենում է հեղինակության կորուստ, և չի կարող որևէ այլ բան լինել: Բնական է` մեր երկրի սոցիալ-տնտեսական, արտաքին այս բարդագույն մարտահրավերների պարագայում նույնը վերաբերում է նաև Հայաստանի իշխանություններին: Բայց մեր ելման կետը երկրում փոփոխությունների իրականացման հնարավորությունից օգտվելն է՝ մեր մասնակցությամբ: Եթե տեսնում ենք, որ կա հնարավորություն երկրի զարգացման մեր պատկերացումները իրականացնելու, մենք երբեք չենք խուսափել պատասխանատվությունից ու աշխատանքից:

- Արդյո՞ք իշխանության հետ կոալիցիա կազմելը վտանգված չէ:

- Որևէ վտանգված բան չկա: Մենք քննարկում ենք անելիքները, ուղղությունները: Մենք մեր աշխատանքը նույն ընթացքով շարունակելու ենք, գործընթացը նորմալ է գնում, որևէ վտանգի խնդիր չկա:

- Այդ դեպքում ինչո՞ւ արդյունք չկա, չէ՞ որ մի քանի շաբաթ է՝ բանակցություններ են ընթանում:

- Նախ` մի քանի շաբաթ չէ, եկեք ավելի կոռեկտ ու ճշգրիտ լինենք. առավելագույնը 10 օր է, և բնական է, որ կան քննարկելու հարցեր: Ամբողջ ցավն այն է, որ հանրության մի մասը, լրատվամիջոցների ջերմ աջակցությամբ, ամեն ինչ փորձում է հանգեցնել պաշտոնների` նախարարի ու մարզպետի պաշտոնների և այլն: Բայց դա չէ էականը, դա չէ խնդիրը: Մենք լրջագույն հարցեր ունենք քննարկելու երկրում փոփոխություններ իրականացնելու խնդրի վերաբերյալ և համաձայնեցնելու մեր մոտեցումները: Շտապելու խնդիր չկա: Ես ենթադրում եմ, որ ամենաուշը մեկ շաբաթից մենք կունենանք պատկերացումներ մասնակցության ձևաչափի և այլ հարցերի վերաբերյալ:

- Իսկ պորտֆելների մասո՞վ ինչ է որոշվել:

- Ես ձեզ ասում եմ, որ կարևորագույն հարցը ուղղություններն են, առաջիկա անելիքները երկրի զարգացման վերաբերյալ, եթե այնտեղ կլինի համաձայնություն, ուրեմն մնացած հարցերը տեխնիկական են: Մենք գիտենք այս շրջանում երկրի առջև ծառացած խնդիրների մասին, տնտեսական բարդագույն խնդիրների մասին: Եթե մենք կարողանանք նաև ձեր միջոցով մեսիջներ ուղարկել մեր հանրությանը, որ երկրում դրական փոփոխությունների ակնկալիք կա, մարդիկ տեսնում են, որ լույս է երևում, ապա մնացած հարցերը երկրորդական են:

- Բայց եթե չունենաք լծակներ, ինչպե՞ս եք փոփոխություններ կատարելու:

- Գիտեք` այդքան պրիմիտիվ չէ, պարզ չէ: Ամենակարևորը, որ մարդիկ տեսնեն, որ այս, այս ուղղություններով կա ընդհանուր գիծ, համաձայնություն: Եթե դա լինի, դրանից հետո, բնականաբար, կունենանք նաև մասնակցություն ու պատասխանատվություն:

- Արդյո՞ք իշխանությունների հետ համագործակցությունը չի վտանգում ՀՅԴ հեղինակությունը:

- Մեր լրատվամիջոցները և վիրտուալ աշխարհը վերջին ամիսներին ներկայացրել են, որ ոչ միայն Դաշնակցությունը, այլև որևէ քաղաքական ուժ վարկանիշ չունի, մենք դրան ուշադրություն չենք դարձնում: Մենք գիտենք մեր անելիքը: Գուցե հասարակության փոքր շերտը ինչ-որ չափով այլ գնահատականներ ունի, բայց դա այլ խնդիր է: Միշտ էլ հայհոյել են, բամբասել են, բայց եթե քաղաքական ուժ ես և ունես պատասխանատվություն, դու քո ճանապարհով գնում ես:

- Իշխանությունների հետ կոալիցիա կազմելը կարո՞ղ է փոխել իշխանությունների որակը:

- Նախ` մենք խոսում ենք համագործակցության ձևաչափերի մասին: Դուք լավ սովորել եք «կոալիցիա» բառը, ուրիշ բառ չեք կարողանում օգտագործել: Եթե մենք ամբողջացնենք համագործակցության եզրերը, ես կարծում եմ, որ դա ինքնին արդեն դրական է: Մի խելքը լավ է, երկուսն ավելի լավ է. առաջարկներ են լինում, գալիս ենք կոնսենսուսի: Մենք ասել ենք, որ սահմանադրական փոփոխությունների ամբողջ իմաստնը այն է, որ կարողանանք ստեղծել քաղաքական նոր մշակույթ, որ որոշումները կայացվեն ոչ թե միանձնյա կամ մի խմբի կողմից, այլ քաղաքական ուժերի մասնակցությամբ` խելք խելքի տալով, իրար զիջելով, ընդառաջելով: