Հայաստանը, ցավոք, չունի այն ֆինանսները, որ կարողանա ներդրումներ անել Իրանում. իրանագետ

Այսօր լրագրողների հետ հանդիպման ժամանակ ՀՀ ԳԱԱ Արևելագիտության ինստիտուտի ավագ գիտաշխատող, իրանագետ, Գոհար Իսկանդարյանը անդրադարձել է ԱՄՆ-ի կողմից Իրանի պատժամիջոցների վերացմանը և դրա հեռանկարներին:

Գոհար Իսկանդարյանի խոսքով` պատժամիջոցների վերացումը նոր շունչ կհաղորդի Իրանի տնտեսությանը: Իրանը կդառնա  ազդեցիկ գործոն և բալանսը պահող երկիր: Պատժամիջոցներից ազատվելուց հետո, Իրանը հնարավորություն կունենա մտնել տարածաշրջանի զարգացման բուն խնդիրների իրականացման փուլ. «Իրանը հնարավորություն կստանա նավթի ու գազի առեւտրով զբաղվել, գորգերի վաճառքով, պիստակի, ձկնկիթի վաճառքով: Չորս հարյուր քաղաքացիների անուններ դուրս հանվեցին սեւ ցուցակից, որոնք չէին կարող առեւտրական գործունեություն իրականացնել, զրկված էին ազատ տեղաշարժից: Իրանին թույլ տրվեց նաեւ մարդատար ինքնաթիռներ գնել»:

Խոսելով հայ-իրանական հարաբերությունների մասին, նա նշեց, որ  Իրանն այս պահին ունի հավելյալ գումարներ և կարող է իրագործել այն բոլոր ծրագրերը, մինչդեռ Հայաստանը չունի ֆինանսներ` Իրանի հետ նախագծերը կյանքի կոչելու համար:

 «Եվրոպական երկրները և բիզնես կենտրոնները հերթ են կանգնած, որ Իրանի հետ նոր պայմանագրեր կնքեն: Հայաստանը, ցավոք, չունի այդ ֆինանսները, որ կարողանանք ներդրումներ անել  Իրանում: Իրանը Հայաստանի դժվար օրերի բարեկամն է, միշտ աջակցել է Հայաստանին դժվար օրերին և Իրանը չի մոռանում, որ երբ ինքն էր մեկուսացված ՀՀ-ն իր դեմ դուրս չի եկել և հնարավորությունների շրջանակում միշտ աջակցել է: Սա լավ գիտակցում և հիշում են Իրանում: Իրանը և Հայաստանը դժվար օրերի բարեկամ են, որը չի մոռացվում»,- ասաց իրանագետը: