Նախկին վարչապետը չի ստանա պահանջած 1 միլիոնը. Շամշյանն էլ չի պատրաստվում հերքում հրապարակել

Երեկ Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանի դատավոր Զարուհի Նախշքարյանը մասնակի բավարարեց ՀՀ նախկին վարչապետ Տիգրան Սարգսյանի հայցն ընդդեմ սնանկացած գործարար Փայլակ Հայրապետյանի:

Հիշեցնենք, որ ՀՀ նախկին վարչապետ Տիգրան Սարգսյանը հայցադիմում է ներկայացրել հիշյալ դատարան՝ պահանջելով պարտավորեցնել գործարար Փայլակ Հայրապետյանին` shamshyan.com էլեկտրոնային լրատվականի միջոցով հերքել զրպարտություն հանդիսացող տվյալները, ինչպես նաև Փայլակ Հայրապետյանից հօգուտ Տիգրան Սարգսյանի բռնագանձել 1 մլն դրամ` որպես բարոյական վնասի հատուցում, և դատական ծախսերը, ներառյալ` փաստաբանի վարձատրության գումարը:

Դատավոր Զարուհի Նախշքարյանն իր վճռով պարտավորեցրել է Shamshyan.com-ի միջոցով հերքել փաստացի որոշ տվյալներ և հօգուտ հայցվորի բռնագանձել 100.000 դրամ` որպես բարոյական վնասի փոխհատուցում:

Դատարանը երեք դրվագներից միայն մեկով է համարել, որ զրպարտություն չկա` այն տեղեկատվության հետ կապված, որ Փայլակ Հայրապետյանն ասել է, թե Տիգրան Սարգսյանը կառավարության շենքում խորհրդակցության է մասնակցել:

Yerkir.am-ի հետ զրուցում Փայլակ Հայրապետյանի ներկայացուցիչ Գրիշա Բալասանյանը նշեց, որ իրենք բողոքարկելու են դատարանի վճիռը: «Փայլակ Հայրապետյանը չի զրպարտել, Տիգրան Սարգսյանի պատիվը չի արատավորել: Ննախկին վարչապետ Տիգրան Սարգսյանը այս վճռով փորձում է իր անունը մաքրել օֆշորային պատմությունից»,- ասաց նա՝ նշելով, որ իրենց համար կանխատեսելի էր նման վճիռը:

Yerkir.am-ի հետ զրույցում գործով որպես երկրորդ պատասխանող ներգրավված ֆոտոլրագրող Գագիկ Շամշյանը հայտնեց, որ տեղյակ չէ դատարանի վճռից: Նա նշեց, որ դատական նիստերին չի մասնակցել, քանի որ երբևէ ծանուցում չի ստացել և, ըստ այդմ, չի պատրաստվում հերքում հրապարակել: