Հավասար իրավունքի դա՞շտ, թե՞ առևտրի խթանում

ԱԺ արտահերթ նիստում քննարկվում է կառավարության ներկայացրած «ԱԱՀ-ի մասին» օրենքում փոփոխություններ կատարելու հարցը:

Հիմնական զեկուցող` էկոնոմիկայի փոխնախարար Գարեգին Մելքոնյանը, ներկայացնելով փոփոխությունը, նշեց, որ դրանով անմաքս առևտրի ռեժիմից կօգտվեն Հայաստանում ոչ միայն օդանավակայանների տարածքում գործող առևտրի կետերը, այլ նաև ցամաքային անցակետերում գործող առևտրի կետերին, մասնավորապես` օրենքի ընդունումից հետո ցամաքային անցակետերում`Մեղրիում, Բավրայում ու Բագրատաշենում, հնարավորություն է ընձեռվելու, որ գործող անմաքս առևտրի կետերը ազատված լինեն ԱԱՀ-ից:

Միջազգային փորձն ուսումնասիրելով, ինչպես նաև հաշվի առնելով նման առաջարկները մասնավոր հատվածի կողմից` կառավարությունը որոշել է դիտարկել նման օրենքի փոփոխություն:

ԱԺ ՀՅԴ խմբակցության պատգամավոր Արծվիկ Մինասյանը հարցրեց, թե դիտարկվո՞ւմ է, արդյոք, այդ փոփոխությունը առևտրի խթանման տեսանկյունից, որովհետև նշվում է, որ նպատակն ընդամենը հավասար իրավունքի դաշտ ստեղծելն է: Պատգամավորը հարցրեց` եթե կա կանխատեսում, ապա որքանո՞վ այս փոփոխությունը կխթանի առևտուրը:

Փոխնախարարը պատասխանեց, որ, իհարկե, այդ փոփոխությունը կարևորվում է առևտրի խթանման առումով, բայց առաջին հերթին դիտարկվել է հավասար իրավունքների տեսանկյունից, որովհետև առաջ անմաքս առևտուրը, որը ազատված է ԱԱՀ-ից, վերաբերում էր միայն օդանավակայաններին: