Հովիկ Աբրահամյանը անկեղծացավ ու խոստովանեց

Այսօր ԱԺ հերթական քառօրյայի նիստում քննարկվում էր 2016թ. բյուջեի նախագծի լրամշակված տարբերակը: Եզրափակիչ ելույթով հանդես եկավ ՀՀ վարչապետ Հովիկ Աբրահամյանը: Նա նշեց, որ բյուջեի նախագծի քննարկումներն անցան շահագրգիռ մթնոլորտում, հնչեցին ծանրակշիռ տեսական ու քաղաքական հարցադրումներ:

«Ինչպես աշխարհի ցանկացած երկրում, Հայաստանում էլ տարեկան բյուջեում երբևէ հնարավոր չի լինում ընդգրկել բոլոր ցանկությունները: Ի վերջո, տարվա գլխավոր ֆինանսական փաստաթուղթը նաև քաղաքական առաջնահերթությունների, հնարավորությունների ու ցանկությունների` հնարավորինս համադրման փաստաթուղթ է:

Իհարկե, կարելի էր որդեգրել այլ մարտավարություն, նախանշել տնտեսական աճի ավելի բարձր նիշ, իսկ հետո բացատրել, թե ինչու հնարավոր չեղավ այն իրականացնել: Հավատացնում եմ ձեզ, որ հիմնավորումներ, այն էլ` այսօր, հաշվի առնելով աշխարհաքաղաքական զարգացումները, որքան ասես, հնարավոր կլիներ գտնել: Բայց լինենք անկեղծ, բյուջետային քննարկումների ժամանակ եղել է նման մոտեցում ևս` գնալ նման ռիսկի և տնտեսական աճը բյուջեում կանխատեսել ոչ թե իրատեսական՝ 2,2 տոկոս, այլ հայտարարել ավելին: Բայց իմ մոտեցումներն անփոփոխ են»,- ասաց Հովիկ Աբրահամյանը:

Նրա խոսքով՝ ցանկացել է իրավիճակը ներկայացնել այնպիսին, ինչպիսին կա` առանց գունազարդումների, միաժամանակ նախանշելով հնարավոր զարգացումների տեսլականն ու առաջնահերթությունները:

Հովիկ Աբրահամյանի խոսքով՝ 2014-ից Հայաստանը հայտնվեց նոր աշխարհաքաղաքական զարգացումների ազդեցության ներքո, և այդ մարտահրավերներն իրենց բովանդակությամբ ոչ միայն տնտեսական են, այլ նաև քաղաքական: Ինչը նշանակում է, որ տնտեսական հաշվարկները դառնում են ոչ կանխատեսելի ու ոչ հաշվելի:

Վարչապետը շեշտում է, որ ներկայումս մեր երկիրն ավելի բարձր աշխարհաքաղաքական ազդեցության տակ է, քան ոչ վաղ անցյալում, երբ ֆինանսատնտեսական ճգնաժամ էր: Նա նշեց, որ տարվա սկզբին տնտեսական շոկերը խնդիր ստեղծեցին Հայաստանի տնտեսության կայունության համար, քանի որ գործընկեր պետություններում գրանցվեց տնտեսական անկում: Դա հանգեցրել է արտահանման նվազմանը:

Հովիկ Աբրահամյանը բարձրաձայնեց, որ 470 միլիոն դոլարով նվազել են տրանսֆերտները, ինչն ազդեց բնակչության սպառման վրա. առևտուրը, 10 ամսվա գնահատականներով, նվազել է 25 տոկոսով: Միաժամանակ, նա նշեց, որ կառավարությունը ջանքեր է գործադրել այդ վիճակից դուրս գալու համար, մշակել ոչ ստանդարտ լուծումներ, կազմել տնտեսական ծրագրեր ու միջոցառումներ, ինչի արդյունքում 9 ամիսների ընթացքում գրանցվել է ՀՆԱ-ի 3,5 տոկոս  աճ: Եվ հիմնական աճը գրանցվել է հանքարդյունաբերության ու գյուղատնտեսության ոլորտներում:

Նա անդրադարձավ նաև վարկային համաձայնագրերին, որոնք շատ են քննադատվում ընդդիմախոսների կողմից, քանի որ դրանք ավելացնում են երկրի արտաքին պարտքը: Հովիկ Աբրահամյանը շեշտեց, որ այդ համաձայնագրերը երկար բանակցությունների արդյունք են, մանրակրկիտ մշակվել են` տևական ժամանակով: Նա այդ վարկերը բաժանեց երեք տեսակի՝ վարկեր, որոնք ապահովում են տարածքային համաչափ զարգացումը՝ դպրոցաշինություն, նոր հիվանդանոցներ, ենթակառուցվածքային վարկեր, որոնք ընդգրկում են Հյուսիս-հարավ ճանապարհաշինարարությունը, էլեկտրահաղորդակցման գծերի անցկացումը, Վեդու և Մաստարայի ջրամբարի կառուցումը, և վարկեր, որոնք արտոնյալ են և տրամադրվում են բյուջեի աջակցության համար, դրանց նպատակը ոչ թե բյուջետային փոսեր լցնելն է, այլ բարեփոխումներ իրականացնելը: