Հովիկ Աբրահամյանը խոստովանեց «մեղքը»

Այսօր կառավարության նիստի վերջում վարչապետ Հովիկ Աբրահամյանը նշեց, որ հանձնարարական է տվել կառավարության տեղեկատվության եւ վերլուծության կենտրոնի տնօրեն Տիգրան Աբրահամյանին, որովհետև, ըստ վարչապետի, կառավարությունն ունի բաց, որի մասին միշտ խոսվել է:

«Օրեր առաջ ԱԺ-ում կառավարությունը ներկայացնում էր օրենք` եկամտահարկի մասին, և այն, ինչ օրենքում գրված էր, դրա մասին պատգամավորների մի մասը չէր խոսում, խոսում էին, կարծես, այլ նախագծի մասին: Ես դա կապում եմ երկու խնդրի հետ: Առաջինը՝ մենք վատ ենք ներկայացնում օրենքները, և երկրորդը՝ տվյալ պատգամավորը ծանոթ չէ օրենք նախագծին և չի հասցրել կարդալ: Բայց պատասխանատվությունը ես վերցնում եմ կառավարության վրա: Մենք պետք է այնպես ճիշտ, բաց ու թափանցիկ ներկայացնենք, որ պատգամավորներն ընկալեն»,- ասաց Հովիկ Աբրահամյանը:

Նա հորդորեց բոլոր նախարարներին ու փոխնախարարներին, ովքեր գնում են ԱԺ` ներկայացնելու օրենքները, լինել ուշադիր այդ հարցում:

Հովիկ Աբրահամյանը նշեց նաև, որ ցանկանում է ավելի արդյունավետ հիմքերի վրա դնել համագործակցությունը ԱԺ հետ: Նա դիմեց կառավարության աշխատակազմի ղեկավար նախարար Դավիթ Հարությունյանին` ասելով, որ ԱԺ արտահերթ նիստերը, որոնք հրավիրում է կառավարությունը, լավ չեն կազմակերպվում` պատգամավորներին ուշ են ուղարկում նախագծերը, և նարնք չեն հասցնում ծանոթանալ դրանց:

«Հանձնարարում եմ ուշադիր լինել և պատգամավորներին գոնե մեկ շաբաթ առաջ ուղարկել օրենքները, որ նրանք ժամանակ ունենան` ծանոթանալու: Ճիշտ է, մենք ունենք հրատապ հարցեր, խնդիրներ, բայց դա ավելորդ խոսակցությունների ու խնդիրների տեղիք է տալիս: Ուրեմն խնդրում եմ, որ ուշադիր լինեք»,- ասաց վարչապետը:

Նշենք, որ խոսքը վերաբերում է հանրության շրջանում «խոպանչիների մասին» անունը ստացած օրենքին, որը ներկայացնում էր ֆինանսների փոխնախարար Վախթանգ Միրումյանը: