Արարատում դիմակավորված անձինք կապկպել են պահակին և զենքի սպառնալիքով խոշոր չափի գումար հափշտակել

Երեկ՝ լուսադեմին, ոստիկանություն ահազանգ է ստացվել զինված ավազակային հարձակման մասին: Ինչպես yerkir.am-ին հայտնեցին ոստիկանությունից, ժամը 05:00-ի սահմաններում դիմակավորված 3 հոգի զինված ներս են մտել Արարատի մարզում գտնվող «ՌՕ Իմպեքս» ՍՊԸ-ի գրասենյակ և այնտեղից կատարել խոշոր չափի գողություն:

Դիմակավորված անձինք զենքի սպառնալիքի տակ կպչուն ժապավենով կապել են ընկերության պահակին, այնուհետև կոտրել մետաղյա պահարանի դուռը և այնտեղից հափշտակել 24 մլն 770 հազար դրամ (51,000 ԱՄՆ դոլար):

Փաստի առթիվ Հայաստանի քննչական կոմիտեի Արարատի մարզային քննչական վարչության Մասիսի քննչական բաժնում նյութեր են նախապատրաստվում: