Դժգոհ ենք լինելու նաև հաջորդ նախագահից, եթե այս համակարգը մնա. Արսեն Համբարձումյան

Սահմանադրական բարեփոխումների քարոզարշավի շրջանակներում ՀՅԴ անդամ Արսեն Համբարձումյանը հանդիպել է Վայոց ձորի մարզի Արենի համայնքի բնակիչների հետ: ՀՅԴ-ականի խոսքով՝ սահմանադրական բարեփոխումներին  «այո» կամ «ոչ» ասելով՝ մենք կանխորոշելու ենք մեր վաղվա օրը: Համբարձումյանը Արենիի ընտրողների հետ հանդիպման ընթացքում ընդգծեց, որ դեկտեմբերի  6-ին կուսակցություն չէ, որ ընտրելու ենք, անհատի չէ, որ ընտրելու ենք, ինչ-որ մեկին չէ, որ վստահության քվե ենք հայտնելու, այլ, բարեփոխված Սահմանադրությանը «այո» ասելով, փոխելու ենք մեր երկրի կյանքն արմատապես:

««Ոչ» ասելով՝ ունենում ենք այն, ինչ այսօր ունենք:  Պարզ, մարդկային տրամաբանություն է. եթե մի կողմ դնենք բոլոր տեսակի փաստարկները, պարզ է դառնում, որ եթե մենք չենք ուզում փոփոխություններ, ուրեմն մեզ այս վիճակը դուր է գալիս, սակայն, հայտնի է, որ մարդիկ ուզում են, որ օր առաջ դրական տեղաշարժեր լինեն: Ամենուրեք տնտեսական, քաղաքական մոնոպոլիա է»,- ասաց նա՝ հավելելով, որ մեր երկրի բնակիչներն այժմ ունեն լավ հնարավորություն՝ փոխելու արմատացած մոնոպոլիան:

ՀՅԴ-ականը հայտարարեց, որ կառավարման այս պայմանները փոխելու համար մարդիկ կա՛մ պետք է գնան իշխանափոխության, կա՛մ էլ էվոլյուցիոն համակարգով, քայլ առ քայլ, տարբեր մեխանիզմներ մշակելով, գնան դրական փոփոխութունների:

 «Մենք քանիցս ունեցել ենք համապետական ընտրություններ, որոնց մասնակցել ենք, գնացել ենք մեր վստահության քվեն ենք տվել որևէ մեկին և այսօր ունենք այն, ինչ ունենք: Դժգոհ էինք Լևոն Տեր-Պետրոսյանից,  դժգոհ էինք Ռոբերտ Քոչարյանից,  հիմա էլ դժգոհ ենք Սերժ Սարգսյանից: Դժգոհ ենք լինելու նաև հաջորդ նախագահից, եթե այս համակարգը մնա: Խնդիրն անձերի մեջ չէ, խնդիրն այն համակարգի մեջ է, որը մենք այսօր ունենք»,- ասաց Արսեն Համբարձումյանը:

Նրա բնորոշմամբ՝ դեռևս 90-ական թվականներին Լևոն Տեր- Պետրոսյանը հայտարարում էր, որ մեր երկրին Սահմանադրություն պետք չէ և բերում էր Մեծ Բրիտանիայի  օրինակը, բայց  ժամանակի ընթացքում  պարզ դարձավ և իրենք էլ հասկացան,  որ առանց հիմնական օրենքի, առանց Սահմանադրության պետություն-հասարակություն, քաղաքացի-իշխանություն հարաբերությունները կարգավորել, պետական շինարարություն իրականացնել հնարավոր չէ:

«1995 թվականին ստեղծեցին մի Սահմանադրություն, որը միայն  մեկ մարդու՝ Լևոն Տեր-Պետրոսյանի, մասին էր: Ամբողջ շարադրանքը վերաբերում էր նրան, թե նախագահն ինչ լիազորություններ ունի և ինչ դերակատարություն ունի պետական կառավարման համակարգում: Մենք այս ամենի պտուղները քաղում ենք առ այսօր»,- բացատրեց ՀՅԴ ներկայացուցիչը:

Նրա կարծիքով՝ որքան էլ հիմա ցանկություն լինի գործող Սահմանադրության թերի կողմերը շտկել, հնարավոր չի լինի փոխել  երկրի վիճակը, կայունացնել այն, քանի որ ողջ համակարգն  ի սկզբանե է սխալ եղել: «Պետք է  ֆունդամենտն ամուր լինի, որ դրա վրա կառուցվող շինություններն էլ ամուր և հիմնական լինի: Ինչքան էլ ուզում է շինարարը լավը լինել, եթե նախագիծը վատն է, չի համապատասխանում չափորոշիչներին, շենքը բանի նման չի լինելու: Մենք սխալ նախագծով պետականություն ենք կերտում արդեն 25 տարի և այսօր դրա հետևանքները բոլորիս աչքերի առջև են»,- ասաց Համբարձումյանը:

ՀՅԴ ներկայացուցիչը  նշեց նաև, որ  սահմանադրական բարեփոխումների  արդյունքում մեր երկրում կվերանա անձակենտրոն համակարգը, այսինքն՝ ողջ իշխանությունը մեկի ձեռքում  կենտրոնացած չի լինի: Ըստ նրա՝ եթե Սահմանադրությունը չի արգելում, քաղաքական ուժն ունի իշխանութուն,  եթե մրցակցության ազատություն չի լինում,  ի վերջո  ունենում ենք այս վիճակը: «Պետք է պատճառների վրա աշխատենք, որպեսզի հետևանքները վերացնենք: Դեկտեմբերի 6-ին եթե «ոչ» ասենք և առաջնորդվենք այն թեզով, թե պետք է գնալ  իշխանափոխության, միամտություն կլինի: Չի կարող այդ տեսակ բան լինել: Ամեն ընտրության շեմին, ամեն  ընտրությունից հետո մեր երկրում տեղի է ունենում ճամբարների բաժանում: Հակառակ բևեռը պնդում է, որ գնալու է իշխանափոխության, բայց մենք տեսնում ենք, որ նման բան չի լինում, քանի որ դա հնարավոր չէ ներկայիս կառավարման համակարգի պայմաններում: Անձակենտրոն համակարգ է գործող Սահմանդրությունը: Գործող համակարգն այնպիսի լծակներ ունի, որ կարող է առանց մեծ դժվարության կանխել իշխանափոխության գործողությունները»,- ասաց Համբարձումյանը՝ հավելելով, որ «ոչ»-ի շարժման ներկայացուցիչների ներկայիս բարձրագոչ խոստումները իրականության հետ կապ չունեն:

«2012 թվականին ՀՅԴ-ն հանդիպում ունեցավ նախագահ Սերժ Սարգսյանի հետ, որի առանցքում մի կարևորագույն հարց էր: Մենք յոթ կետեր էինք հրապարակել: Այդ  և մի շարք այլ կետերի շուրջ քննարկան արդյունքում արձանագրեցինք, որ մեր և նախագահ Սարգսյանի տեսակետները  տարբեր են: Նա ասում էր, որ մեր երկրում խորհրդարանական համակարգի ժամանակը չէ, համամասնական ընտրակարգն ընդունելի չէ և այլն, բայց դրանից հետո տեղի ունեցան այնպիսի իրադարձություններ, որ նոր Սահմանադրության առաջ քաշման հարցն անհրաժեշտություն դարձավ»,- շեշտեց ՀՅԴ ներկայացուցիչը և հավելեց.  «Եթե 13 թվականի ընտրությունների ժամանակ հաղթեր Րաֆֆի Հովհաննիսյանը կամ մեկ այլ թեկնածու, պատկերացնո՞ւմ եք՝ գործող Սահմադրության պայմաններում ինչ ներքաղաքական կոնֆլիկտ էր լինելու: Մենք կունենայինք ՀՀ նախագահ մեկ այլ քաղաքական ուժից, ով չուներ քաղաքական մեծամասնություն»:

Համբարձումյանը նշեց նաև, որ իշխանությունները կողմ են սահմանադրական բարեփոխումներին, քանի որ ամեն ինչ կորցնելու վտանգ կա և դրան չգնալու համար պետք է զիջել մի մասը: Այսինքն՝ ամբողջը չկորցնելու համար, անհրաժեշտ է զիջել մի մասը: ՀՅԴ ներկայացուցիչի  խոսքով՝ նոր Սահմանադրության նախագիծը լավ հնարավորություն է նաև դատական համակարգի հնարավորինս անկախ գործելու համար: