Փարիզում ահաբեկչությունների օրը Կ.Պոլսում ևս ահաբեկչություն է նախատեսվել. France-Presse

France-Presse գործակալությունը Փարիզում տեղի ունեցած ահաբեկչությունների մասին ուշագրավ պնդում է առաջ քաշել:

Ինչպես տեղեկացնում է Demokrathaber-ը, գործակալությունը պնդել է, որ Փարիզում տեղի ունեցած ահաբեկչությունների օրը միաժամանակ ահաբեկչություն է նախատեսվել Կ.Պոլսում, սակայն կանխվել է:

Ֆրանսիական գործակալությունն այս պնդումն արել է թուրք բարձրաստիճան պաշտոնյաներից մեկի խոսքերի հիման վրա, ով Փարիզի ահաբեկչությունների օրը հայտարարել է, թե ԻՊ-ի հինգ անդամներ, այդ թվում` «ջիհադիստ Ջոն» անունով հայտնի` ԻՊ ղեկավարներից մեկը ձերբակալվել են Կ.Պոլսում:

«Հավատում ենք, որ նրանք նման ահաբեկչություն նախատեսում էին նաև Կ.Պոլսում: Նախնական տվյալներով` կանխել ենք շատ մեծ ահաբեկչություն»,- հայտարարել էր թուրք պաշտոնյան: