Գուսան Հայկազունն արդեն իրեն լավ է զգում, անգամ` համերգի է պատրաստվում

Տեղեկացրել էինք, որ դեռևս 2014-ի տարեվերջին գուսան Հայկազունի մոտ քաղցկեղ էին հայտնաբերել: Ավելի ուշ` այս տարվա սկզբին, հայտարարվեց, որ սիրված գուսանն օգնության կարիք ունի` քիմիաթերապիան ավարտին հասցնելու համար: Այսօր արդեն, հուրախություն բոլորիս, նա, կարծես, ոտքի է կանգնել:

Yerkir.am-ի հետ զրույցում գուսան Հայկազունը նշեց, որ իրեն արդեն լավ է զգում, ոտքի է կանգնել: «Շնորհակալ ենք բոլորին, ազգն ինչքանով կարողացավ` կանգնեց մեր կողքին, և հենեց դրա շնորհիվ ես այսօր ինձ լավ եմ զգում: Օրերս Արցախ էի գնացել. այնտեղ հոկտեմբերի 28-ին Երիցվանքի դպրոցի 12-րդ դասարանը կոչվեց իմ անունով, շատ ուրախ էի: Բացի այդ էլ՝ գրեթե ամեն օր ինչ-որ միջոցառման եմ մասնակցում, իսկ նոյեմբերի 23-ին «Արամ Խաչատրյան» համերգասրահում կլինի համերգ` իմ երգերի լավագույն կատարողների և իմ մասնակցությամբ»,- ասաց գուսանը` հավելելով, որ առաջիկայում էլի ծրագրեր կան:

Համերգն, ի դեպ, կկրի «Հայեր, միացեք» խորագիրը, ելույթ կունենան Արսեն Գրիգորյանը /Մրո/, Արուս Գուլանյանը, Ռուբեն Սասունցին… Համերգին կմասնակցեն նաև «Կարին» և «Հայկազունք» համույթները:

Գուսան Հայկազունի կինը` տիկին Արմինեն, նշեց, որ ամուսինն իրեն, իրոք, լավ է զգում, արդեն դեպի լավն է գնում, թեև բուժումն ընթացքի մեջ է: «Նա շատ լավատես է, ինչն էլ իրեն շատ օգնեց: Բուժումն, այո, ընթացքի մեջ է, բայց փորձում ենք ինքներս դժվարությունները հաղթահարել: Նա դեռ բժիշկների հսկողության տակ է, բայց, կարևորը, ինքնազգացողությունը լավ է, տրամադրությունը` բարձր»,- ասաց տիկին Արմինեն: