Չեմ զարմանա, եթե Տարոն Մարգարյանին ազատամարտիկի կոչում տան. Ռազմիկ Ռուշանյան

Այսօր արժեքներն այնքան են խախտվել, որ զարմանալի չի լինի, եթե Տարոն Մարգարյանին ազատամարտիկի կոչում տան. այսօր լրագրողներին ասաց «Ազատամարտի և զորացրված զինծառայողների իրավունքների պաշտպանություն» միության նախագահ Ռազմիկ Ռուշանյանը:

Ըստ նրա` հիմա առաջին պլանում ճառ ասողներն են, օրինակ, Ռուշանյանի կարծիքով, Էդուարդ Շարմազանովը, որին հենց ճառ ասելու համար էլ Արիության մեդալով են պարգևատրում` զանգ կախողներին անտեսելով: «Եթե կռիվ լինի` ո՞վ է գնալու սահման, էլի մենք, մեր տղաները, ոչ թե Շարմազանովի նմաններն ու իր տղաները»,- ասաց Ռուշանյանը:

Ըստ նրա` չի կարելի քաղաքականություն խաղալ ազատամարտիկների պահով: «Էդ էն ոլորտը չի: Ազատամարտիկ` այս սուրբ հասկացությունը դարձել է ցեխի մեջ ընկած անպետք իր»,- ասաց միության նախագահը:

Ռուշանյանը նշեց նաև, որ կուզենար կուսակցություններից մեկին, որը հաճախ է մեջբերում Նժդեհին, հիշեցնել հենց Նժդեհի խոսքերը. «Մեր դժբախտությունն այն չէ, որ աշխարհում կան թուրքեր, այլ այն, որ կան թուրքանման հայեր»: «Դուք կատարում եք թուրքերի պարտականությունը մեր մեջ: Հիմա ի՞նչ, մենք էլ ինքնապաշտպանական ջոկատնե՞ր կազմենք, որ պայքարենք ձեր դեմ»,- նշեց նա: