Ի՞նչ կլինի, եթե սահմանադրական բարեփոխումները չանցնեն

Այսօր խորհրդարանական ճեպազրույցներում ՀՀԿ խմբակցության ղեկավար Վահրամ Բաղդասարյանը խոսեց սահմանադրական փոփոխությունների հանրաքվեի մասին: Նա ասաց, որ Հանրապետական կուսակցությունն ամեն ինչ անելու է, որպեսզի սահմանադրական բարեփոխումների հանրաքվեն անցնի ամենաբարձր մակարդակով, որ իշխանությունները այլընտրանք չունեն՝ հանրաքվեն իրականացնելու են թափանցիկ, որովհետև դրան  հետևելու է ամբողջ միջազգային հանրությունը:

«Բնականաբար, ինչպիսի հանրաքվե էլ անցկացվի, կլինեն նաև քննադատություններ, որովհետև ամեն պարտվող իր կարծիքն արդարացնելու համար  միշտ քննադատում է: ՀՀԿ-ն ամեն ինչ անելու է, որպեսզի հանրաքվեն անցնի ամենաբարձր մակարդակով, լինի ընկալելի միջազգային հանրության համար»,- վստահեցրեց նա:

Վահրամ Բաղդասարյանը հավաստիացրեց՝ ոչ մի պայթյունավտանգ բան տեղի չի ունենա, եթե հանրաքվեի արդյունքում սահմանադրական բարեփոխումները չանցնեն: «Կշարունակենք գործող Սահմանադրությամբ աշխատել»,- հավելեց նա:

Հարցին, թե ո՞ր քաղաքական ուժերի հետ են անցկացնելու Սահմանադրության հանրաքվեի քարոզարշավը, Վահրամ Բաղդասարյանը պատասխանեց, որ այս առնչությամբ քննարկումներ դեռևս չեն անցկացրել։ «Հրամանագիրը դեռ նոր է ստորագրվել, դրա համար չենք քննարկել: Հենց քննարկենք, տեղյակ կպահենք»,- ասաց նա: