Բամփվում են նրանք, ովքեր դրա կարիքն ունեն. Գալուստ Սահակյան

Այսօր ԱԺ նախագահ Գալուստ Սահակյանը լրագրողների հետ զրույցում անդրադարձավ Հայաստանի երկրորդ նախագահ Ռոբերտ Քոչարյանի երեկվա հայտարարությանը, ըստ որի` նա կտրուկ դեմ է սահմանադրական փոփոխություններին:

«Ռոբերտ Քոչարյանը Հայաստանի երկրորդ նախագահն է և պետք է իր տեսակետն ասեր: Ասել է»,- նշեց Գալուստ Սահակյանը:

Լրագրողների հարցին, թե իր համար ընդունելի՞ է Ռոբերտ Քոչարյանի քննադատությունը, պատասխանեց. «Դա հիմա քննարկելի չի, որովհետև այդ խնդրին ընդդիմադիրները անդրադարձել են, մեր գործիչներն էլ պատասխանել են: Վերջին հաշվով` Հանրապետականը սատարող ուժ է եղել Ռոբերտ Քոչարյանին: Կցանկանայի, որ ավելի բարձր արժևորումներով քաղաքական ճանապարհով գնային»:

Հարցին` տպավորություն չունի՞, որ Ռոբերտ Քոչարյանը դառնում է շարքային ընդդիմադիր, Գալուստ Սահակյանը պատասխանեց. «Ոչ, նման տպավորություն չունեմ, որովհետև ընդդիմադիր դառնալու համար նախ պետք է հայտարարել: Քոչարյանը որևէ կուսակցության ներկայացուցիչ չէ, թիմ չունի, վաղ է խոսել հաջորդ նախագահի թեկնածության մասին»:

Իսկ, ԱԺ նախագահի կարծիքով, Ռոբերտ Քոչարյանը արատավոր համակարգի հիմնադիրների՞ց է, ինչպես երեկ հայտարարել էր ԱԺ նախագահի տեղակալ Էդուարդ Շարմազանովը: Այս հարցին Գալուստ Սահակյանը պատասխանեց. «Նախ` Էդուարդ Շարմազանովը նման գնահատական չի տվել, դուք փոխում եք նրա ասածը: Իսկ եթե համակարգը արատավոր է, բոլորս մեր մեղքի բաժինն ունենք: Բայց ես չեմ կարծում, որ համակարգն այնքան լարված է, որ կարելի էր նման գնահատականներ տալ»:

ԱԺ նախագահը նշեց, որ Քոչարյանի հարցազրույցից չի ստացել տպավորություն, թե նա ցանկանում է մտնել քաղաքականության մեջ կամ առաջադրվել` որպես նախագահի թեկնածու: «Քոչարյանի հարցազրույցը շատ շտապողական էր, որն իր խորքերում լիարժեք քաղաքական կողմնորոշումներ ու դրվագներ չունի»,- ասաց նա:

Լրագրողները նաև հետաքրքրվեցին` ո՞վ է հաջորդ քաղաքական առաջնորդը, որի մասին ակնարկել էր Սերժ Սարգսյանը, ԱԺ նախագահը պատասխանեց. «Ես էլ կարող եմ ասել` իմ մտքում էլ կա այդ թեկնածուն, բայց եթե իմ մտքում է, իմ միտքը իմ սեփականությունն է»:

Նա չի կարծում, թե Քոչարյանի քննադատությունն այն «ծիրն է», որը կարող է ավելի ուժեղ լինել, քան «ոչ»-ի կողմնակիցների քննադատություններն են: Բացի այդ, Սահակյանի խոսքով, որքան քննադատությունները շատ լինեն, այնքան կուժեղանա Հանրապետականը:

«Բայց վտանգ տեսնո՞ւմ եք` դեմս Քոչարյանի» հարցին, Գալուստ Սահակյանը պատասխանեց. «Հայը հայից վտանգ չի սպասում, Հանրապետականը որևէ քաղաքական ուժի հետ պատերազմելու որևէ նպատակ չունի»:

Հարցին` այդ դեպքում ինչո՞ւ «պատերազմեցին» Ծառուկյանի դեմ, պատասխանեց. «Չեմ կարծում, որ Գագիկ Ծառուկյանի հետ պատերազմ եղավ. ինչպիսի կեցվածք ուներ պետության ներսում, նույն ձևով էլ պահպանվել է»:

Հարցին` կարո՞ղ է մի օր էլ որոշեն Ռոբերտ Քոչարյանին «բամփել», Գ.Սահակյանը պատասխանեց. «Մենք երբևիցե նման բան չենք որոշում: Բամփվում են նրանք, ովքեր դրա կարիքն ունեն»:

Իսկ տեսնո՞ւմ է, արդյոք, Քոչարյանին «Ոչ»-ի ճակատում, արձագանքեց. «Ես չեմ էլ պատկերացնում` «Ոչ»-ի ճակատ ասածն ինչ է: Էդ ճակատը պիտի բնորոշվեր այն օրը, երբ քվեարկության էր դրվում սահմանադրական փոփոխությունների նախագիծը: Գոնե մի 50 մարդ հավաքվեր, որ ասեինք, որ դա «Ոչ»-ի ճակատ է»: 

Գալուստ Սահակյանը նաև հավելեց` եթե Լևոն Տեր-Պետրոսյանը ցանկացավ վերադառնալ քաղաքականություն, ապա ինչո՞ւ Ռոբերտ Քոչարյանը չպետք է ցանկանա վերադառնալ: