Սերժ Սարգսյանը չի հավակնելու ո՛չ նախագահի, ո՛չ վարչապետի, ո՛չ էլ ԱԺ նախագահի պաշտոններին. Վարդան Պողոսյան

Այսօր ԱԺ պետա-իրավական հարցերի մշտական հանձնաժողովում քննարկվում է սահմանադրական փոփոխությունների նախագիծը:

Պատգամավոր Տիգրան Ուրիխանյանը հարցրեց, թե այս պահին սահմանադրական փոփոխություններ ձեռնարկելը նպատակ չունի՞, արդյոք, ապահովել Սերժ Սարգսյանի պաշտոնավարման երկարաձգումը:

Սահմանադրական փոփոխությունների մասնագիտական հանձնաժողովի անդամ Վարդան Պողոսյանը պատասխանեց, որ իշխանությունների վերարտադրման թեզը չունի անհրաժեշտ հիմնավորումներ, որովհետև գործող Սահմանադրությունը նույնպես թույլ է տալիս ապահովել վերարտադրություն:

«Եթե պահպանվի այս համակարգը, ապա որևէ բան չի խանգարում հաղթող ուժին` շարունակել կառավարել. 2017-ին կունենար մեծամասնություն պառլամենտում՝ ձևավորելով կառավարություն, և եթե անգամ 2018-ի նախագահական ընտրությունները լինեին ի վնաս պառլամենտական մեծամասնության, ապա այդ իրավիճակը հնարավոր է որոշ առճակատում մտցներ նախագահի ու պառլամենտական մեծամասնության միջև, սակայն նախագահը չէր կարողանա վճռորոշ կերպով ազդել կառավարության գործունեության վրա:

Եթե նախագահ Սերժ Սարգսյանը հայտարարած չլիներ, որ սահմանադրական փոփոխությունների դեպքում ինքը չի հավակնելու ո\'չ նախագահի, ո\'չ ԱԺ նախագահի, ո\'չ էլ վարչապետի պաշտոնին, ապա կարելի կլիներ ինչ-որ չափով թերևս վերարտադրության հարցը հիմնավորված համարել, բայց մեզ հետ հանդիպման առաջին իսկ օրը նախագահը հստակ հայտարարեց, որ չի հավակնելու այդ պաշտոններին»,- ասաց Վարդան Պողոսյանը: