Հայաստանի առաջնություն. «Շիրակ»-ը առաջին պարտությունը կրեց

Ֆուտբոլի Հայաստանի Բարձրագույն խմբի առաջնության 4-րդ տուրում Գյումրիի «Շիրակ»-ը հյուրընկալվելիս 3:0 հաշվով պարտվեց «Փյունիկ»-ին:

Հանդիպման արդեն 10-րդ րոպեին Կամո Հովհաննիսյանը առաջ մղեց տանտերերին: 42-րդ րոպեին Արթուր Յուսպաշյանը կրկնապատկեց երևանցիների առավելությունը, իսկ 65-րդ րոպեին Վարդան Պողոսյանը վերջակետ դրեց հանդիպմանը:  «Շիրակ»-ն ընթացիկ մրցաշրջանում առաջին պարտությունը կրեց:

Նույն հաշիվը գրանցվեց նաև «Բանանց»-«Արարատ» խաղում: Վարուժան Սուքիասյանի թիմը կրեց առաջին պարտությունը ընթացիկ մրցաշրջանում, իսկ «Բանանց»-ը տոնեց առաջին հաղթանակը: Տանտերերի կազմում արդեն 2-րդ րոպեին  հաշիվը բացեց Ջոն Ջերեմիան:20 րոպե անց Միգել Լոպեսը 2-րդ գնդակն ուղարկեց հյուրերի դարպասը, իսկ 70-րդ րոպեին Նաիրի Մինասյանը ձևակերպեց հանդիպման վերջնահաշիվը: