Նա դա արել է, որպեսզի չտուժի իր բիզնեսը...

Արդեն հայտնել ենք, որ ՀՖՖ-ի նախագահ Ռուբեն Հայրապետյանի թիկնազորի կողմից ծեծի ենթարկված «Էյր Արմենիա» ընկերության սեփականատեր Արսեն Ավետիսյանը հայտարարությամբ է հանդես եկել և հայտնել, որ հաշտվում է Ռուբեն Հայրապետյանի հետ:  

ՀՀԿ խմբակցության ղեկավար Վահրամ Բաղդասարյանը Yerkir.am-ի հետ զրույցում հայտարարեց` ինքը բացառում է այն տարբերակը, որ Ռուբեն Հայրապետյանը ճնշում է գործադրել Արսեն Ավետիսյանի և իր ընտանիքի վրա, ինչի հետևանքով էլ Ավետիսյանը նման հայտարարություն է արել: «Բացառում եմ ուժ կիրառելու և ճնշումներ գործադրելու տարբերակը: Եվ ասեմ, որ դա տարածված ձև է: Եթե երկու մարդ իրար հաշտության ձեռք են մեկնում, կամ ընդդիմության դաշտից, կամ լրատվական դաշտից դա վերագրում են ճնշումների: Մարդը պարզաբանում է տվել չէ՞: Նա դա արել է, որպեսզի հետագայում չտուժի իր բիզնեսը և բացի տուժողը, նրա հարազատները, կինը կան չէ: Հո բոլորին չճնշեցի՞ն»,- ասաց Բաղդասարյանը` հավելելով. «Մարդիկ երևի իրար չեն հասկացել: Ես չգիտեմ` կոնկրետ ինչ է եղել այնտեղ, բայց բոլորս պետք է ուրախանանք, որ վեճից հետո մարդիկ հաշտվում են»: Վահրամ Բաղդասարյանի խոսքով`եթե Արսեն Ավետիսյանը ճնշվող լիներ, հենց սկզբից կճնշվեր ու հենց սկզբից էլ պահանջներին կհամաձայնվեր: «Ուրեմն էդ մարդը ճնշվող մարդ չի չէ՞»,- ասաց ՀՀԿ խմբակցության ղեկավարը: