ԱԺ-ն իր հերթին... կարեւորը` շտաբի աշխատանքը չտուժի

Հանրապետական կուսակցությունում ԱԺ նախագահի թեկնածության հետ կապված որեւէ քննարկում չի եղել եւ որեւէ որոշում չի կայացվել. այսօր այս մասին լրագրողներին հայտնեց ԱԺ պատգամավոր, ՀՀԿ խմբակցության անդամ Հովհաննես Սահակյանը:

Ինչ վերաբերում է ԱԺ նախագահի իր նախընտրած թեկնածուին, ապա նա նշեց, որ, որպես հանրապետական կուսակցության խորհրդի անդամ, դրական է վերաբերում շրջանառվող ցանկացած անվան, կուսակցությունն էլ, վստահ է, հաշվի կառնի եւ փորձառությունը, եւ ԱԺ-ում այս տարիներին ձեռք բերած գիտելիքները:

«Պարզ է, որ հաջորդ նախագահը, որին կառաջադրեն, պետք է կարողանա այս նախընտրական ժամանակահատվածում այդ կարեւոր առաքելությունը մինչեւ վերջ տանել, որովհետեւ ԱԺ-ը` որպես ներկայացուցչական մարմին, հերթական ընտրություններում կարող է ունենալ որոշակի դերակատարություն»,- նկատեց նա:

Հարցին` վաղաժամ չէ՞ր Հովիկ Աբրահամյանի հրաժարականը, ՀՀԿ-ական գործիչը պատասխանեց, որ Հանրապետական կուսակցությունը` որպես իշխող քաղաքական ուժ, հերթական ընտրություններին ավելի լուրջ է վերաբերում եւ ունի այն քաղաքական կամքը, որպեսզի ընտրությունները անցկացվեն արդար եւ թափանցիկ, իսկ դրա համար պետք է լուրջ նախապատրաստական աշխատանք տանել:

«Քանի որ բոլորիս ապագան ուղղակի կախված է ԱԺ հերթական ընտրությունների հետ, ապա, իմ կարծիքով, լրջությունը տեղափոխվում է այդ հարթություն: Եվ եթե մենք հայտարարում ենք, որ հերթական ընտրությունները պետք է անցնեն արդար, թափանցիկ, ապա այս պարագայում, ես կարծում եմ, որ ցանկացած քաղաքական ուժ, առավել եւս` Հանրապետականը, պետք է խնդիրը դիտարկի հենց այս տեսանկյունից` կարեւորելով հերթական ընտրութունները եւ նախընտրական շտաբի գործունեությունը»,- պարզաբանեց Սահակյանը` հավելելով, որ ԱԺ-ն իր հերթին, բայց քանի որ ընտրությունները պետք է կազմակերպի հենց նախընտրական շտաբը, ոչ թե ԱԺ-ը, ապա այս պարագայում կարեւոր է հատկապես շտաբի գործունեությունը: