ԿԳՆ շենքում բռնկված հրդեհի պատճառները պարզելու համար փորձաքննություն է նշանակվել

Արդեն հայտնել ենք, որ երեկ հրդեհ է բռնկվել Կրթության և գիտության նախարարության շենքում : Ըստ ՏԿԱԻՆ-ի ՝ հրդեհը բռնկվել է նախարարության հաշվապահության և հաշվառման բաժնի սենյակում: Մասամբ այրվել է 7-րդ հարկում գտնվող ՀՀ կրթության և գիտության նախարարության հաշվապահական հաշվառման սենյակը՝ գույքով (20) քմ:

Yerkir.am-ի հետ զրույցում ՀՀ ԿԳՆ մամլո խոսնակ Զահրաբ Եգանյանը հայտնեց, որ հրդեհի առաջացման պատճառները պարզելու նպատակով համապատասխան փորձաքննություն է նշանակվել: Նա հայտնեց, որ հասցված վնասն այդքան էլ մեծ չէ, բացի այդ նախարարության հաշվապահական փաստաթղթաշրջաանառոււնը մեծ մասամբ էլեկտրոնային եղանակով է կատարվում և որոշ փաստաթղթերի այրվելը ծանր հետևանքներ չի ունենա: Եգանյանը նշեց, որ վնասի չափը դեռևս հայտնի չէ:

Հիշեցնենք, որ երեկ՝ ժամը 13.14-ին, ՏԿԱԻՆ–ում ահազանգ է ստացվել, որ Կառավարության թիվ 3 մասնաշենքի 6, 7, և 8-րդ հարկերից ծուխ է նկատվում: Դեպքի վայր էին մեկնել ՃԿԱԿ օպերատիվ և ԱԻ արձագանքման խմբերը, 6 մարտական հաշվարկ և 1 ավտոսանդուղք: Հրդեհը մեկուսացվել է ժամը 14.04-ին, մարվել՝ 14.08-ին: