Հոգիս էր պարտադրում նկարահանել այն. երիտասարդ ռեժիսորն իր` Ցեղասպանության թեմայով ֆիլմի մասին

Համլետ Դուլյանի «Ընկղմում կրակի մեջ»  ֆիլմն ընդգրկված է «Ոսկե ծիրան»  կինոփառատոնի «Մենք կանք» ծրագրում: Ֆիլմը պատմություն է թուրք զինվոր Այդինի մասին, որը գալիս է հայերի տուն և պետք է սպանի բոլորին:

Ֆիլմի ռեժիսորը լրագրողների հետ հանդիպման ժամանակ նշեց, որ ֆիլմի միջոցով ուզում էր մեր պատմությունը ցույց տալ, բայց այնպես, որ մարդը, որը կնայի ֆիլմը, անկախ ազգությունից, պատմությունն ընկալելու ընտրություն ունենա:

«Ինձ ասում էին` դու 19 տարեկան ես, քեզ համար շատ բարդ թեմա է, բայց ես ասելիք ունեի, որն էլ ուզում էի ֆիլմի միջոցով տեղ հասցնել: Ֆիլմի տևողությունը 17 րոպե է, այն թուրքերեն է, ինչն ինձ համար շատ կարևոր է, քանի որ հայերը լավ գիտեն Ցեղասպանության մասին բոլոր մանրամասները»,- ասաց Դուլյանը:

Ըստ նրա` ֆիլմում, ներկայացնելով այդ օրերի դեպքերը, փորձել է քաղաքական ենթատեքստ չմտցնել, այլ ուղղակի դեպքերը նկարագրել այնպես, ինչպես կան: «Ուզում էի մարդկային պատմություն ներկայացնել, որպեսզի այն տպավորվի հանդիսատեսի մեջ: Ինձ համար շատ կարևոր ֆիլմ է, քանի որ երկար եմ աշխատել դրա վրա և այն ինձ շատ է տանջել: Չէի կարող այն չնկարահանել, քանի որ հոգիս էր պարտադրում այն նկարահանել»,- ասաց ռեժիսորը:

Ի դեպ, Դուլյանը նշեց նաև, որ իր նախնիները Վանից ու Մուշից են եղել: