Օֆշորային սկանդալի գործով ամբաստանյալն իրեն մեղավոր չճանաչեց. նրան առավելագույն պատիժ է սպառնում

ՀՀ նախկին վարչապետ Տիգրան Սարգսյանի, Նավասարդ արքեպիսկոպոս Կճոյանի հետ կապված օֆշորային մեքենայությունների գործով ամբաստանյալ Աշոտ Սուքիասյանն իրեն մեղավոր չճանաչեց հարկային պարտավորություններ չկատարելու, գործարար Փայլակ Հայրապետյանի գույքի նկատմամբ իրավունք ձեռք բերելու մեջ:  Այս մասին այսօր Էրեբունի և Նուբարաշեն վարչական շրջանների ընդհանուր իրավասության դատարանում հայտարարեց ամբաստանյալը:

Մինչ այդ  նիստը նախագահող դատավոր Վարդան Գրիգորյանը, ներկայացնելով ամբաստանյալի իրավունքներն ու պարտականությունները, հիշեցրեց, որ նա չի կարող միջնորդել արագացված դատական կարգ սահմանել, քանի որ ամբաստանյալին առաջադրված հոդվածներից մեկը նախատեսում է առավելագույն՝ 10 տարի ժամկետով պատիժ:

Հիշեցնենք, որ, մեղադրական եզրակացության համաձայն, Աշոտ Սուքիասյանը խարդախությամբ ուրիշի` առանձնապես խոշոր չափերով գույքի նկատմամբ իրավունք է ձեռք բերել, օրինականացրել հանցավոր ճանապարհով ստացված` առանձնապես խոշոր չափերով եկամուտներ, ինչպես նաև չարամտորեն խուսափել առանձնապես խոշոր չափերով հարկեր, տուրքեր և պարտադիր այլ վճարումներ կատարելուց:

Այսօրվա դատական նիստում ցուցմունք տվեց գործով տուժող Փայլակ Հայրապետյանը: