Օֆշորային սկանդալի գործով ցուցմունք կտա «Ամերիաբանկ»-ի տնօրենը

Էրեբունի և Նուբարաշեն վարչական շրջանների ընդհանուր իրավասության դատարանում նախկին վարչապետ Տիգրան Սարգսյանի և Նավասարդ արքեպիսկոպոս Կճոյանի անվան հետ կապված օֆշորային սկանդալի գործով այսօր պետք է հարցաքննվեր Կենտրոնական բանկի աշխատակից Պավել Հովակիմյանը: Թեև նրան դատարանը պատշաճ ծանուցել էր, սակայն նա չէր ներկայացել դատարան: Չէր ներկայացել նաև գործով վկա` բանկի աշխատակից Սերգեյ Պետրոսյանը:

Դատարանը որոշում կայացրեց կրկին ծանուցել վկաներին` նշելով, որ ձեռնպահ կմնա բերման որոշում կայացնելուց: Դատարանը ծանուցեց գործով 4 այլ վկաների, այդ թվում` «Ամերիաբանկ»-ի կորպորատիվ հաճախորդների գծով տնօրեն Սահակյանին: Այսպիսով` այսօրվա դատական նիստը հետաձգվեց, հաջորդը նշանակվեց հունիսի 30-ին:

Հիշեցնենք, որ, մեղադրական եզրակացության համաձայն, Աշոտ Սուքիասյանը խարդախությամբ ուրիշի` առանձնապես խոշոր չափերի գույքի նկատմամբ իրավունք է ձեռք բերել, օրինականացրել հանցավոր ճանապարհով ստացված` առանձնապես խոշոր չափերով եկամուտներ, ինչպես նաև չարամտորեն խուսափել առանձնապես խոշոր չափերով հարկեր, տուրքեր և պարտադիր այլ վճարումներ կատարելուց: