«Բանդայի գործով» ամբաստանյալն էմոցիոնալ խանգարումներ ունի

Մի շարք մեծահարուստների տներ թալանած «Բանդայի» գործով ամբաստանյալ Քյարամ Ամոյանը հոր մահվանից հետո ծանր սթրեսային վիճակում է` մեկուսացել է, հարազատների և փաստաբանի հետ չի շփվում, նրա մոտ ի հայտ են եկել էմոցիոնալ խանգարումներ: Այս մասին «Դատապարտյալների հիվանդանոց» ՔԿՀ-ից հայտնել են Ամոյանի պաշտպան Սամվել Հովհաննիսյանին: Պաշտպանի խոսքով` իրեն չի հաջողվել տեսակցել իր պաշտպանյալի հետ, քանի որ նա ի վիճակի չի եղել գալ տեսակցության:

Քյարամի հարազատները yerkir.am-ի հետ զրույցում հայտնեցին, որ նրան հոր մահվանից հետո չեն տեսել: Նշենք, որ Քյարամի հայրը մահացել է ապրիլի 17-ին, սակայն կալանավորվածին թույլ չեն տվել մասնակցել հուղարկավորությանը:

Մեկ ամիս առաջ Ամոյանի պաշտպանը միջնորդել էր նրա նկատմամբ դատաբժշկական փորձաքննություն նշանակել` պարզելու` արդյո՞ք ի վիճակի է մասնակցել դատական նիստերին: Հովհաննիսյանի խոսքով` դատարանը 10 օր առաջ ստացել է պատասխանը:

Այսօրվա դատական նիստում, սակայն փորձաքննության արդյունքները հնարավոր չեղավ հրապարակել, քանի որ նիստը հետաձգվեց: Նիստին չէին ներկայացել մեղադրող դատախազներ Արսեն Բեգինյանը և Սասուն Խաչատրյանը: Վերջինս, ինչպես հայտնեց նախագահող դատավոր Մակյանը, գործուղման է` հանրապետությունից դուրս: Ի դեպ, Արսեն Բեգինյանն այս գործով նոր է ներգրավվել` որպես դատախազ: Դատավորի խոսքով` նա բուժման նպատակով գտնվում է արձակուրդում:

Հաջորդ դատական նիստը կկայանա մայիսի 14-ին:

Լուսանկարը` aravot.am-ի