Միհրան Պողոսյանի անվան հետ կապված օֆշորային սկանդալի գործով պաշտոնյաներ են հարցաքննվել

Yerkir.am-ի տեղեկություներով՝ ՀՀ ԱՆ դատական ակտերի հարկադիր կատարման ծառայության նախկին պետ Միհրան Պողոսյանի նկատմամբ պանամական օֆշորային գործարքների վերաբերյալ՝ ձեռնարկատիրական գործունեությանն ապօրինի մասնակցելու կապակցությամբ հարուցված քրեական գործով նոր զարգացումներ կան: Մեր տեղեկություններով՝ ՀՔԾ-ում քննվող հիշյալ գործի շրջանակներում վերջերս հարցաքննվել են միջազգային կազմակերպությունների բարձրաստիճան պաշտոնյաներ:

Թե կոնկրետ ինչ ցուցմունքներ են տվել պաշտոնյաներն, առայժմ հայտնի չէ: Ավելի վաղ հայտնել ենք, որ մայիսի 2-ին ՀՀ ՀՔԾ-ում հարուցվել էր քրեական գործ` ՀՀ Քրեական օրենսգրքի 310 հոդվածի հատկանիշներով` «Ձեռնարկատիրական գործունեությանն ապօրինի մասնակցելը», այսինքն` պաշտոնատար անձի կողմից, օրենքով սահմանված արգելքին հակառակ:

Հիշեցնենք, որ Պողոսյանի կողմից օֆշորային գործարքների վերաբերյալ սկանդալային հրապարակումներից հետո ԴԱՀԿ ծառայության պետը հրաժարական տվեց` հայտարարելով, որ ցավում է, որ իր անունը նույն փաստաթղթերում հայտնվել է Ադրբեջանի նախագահ Իլհամ Ալիևի ընտանիքի կողքին։ Այնուհետև Պողոսյանի գրասենյակը հանդես եկավ հայտարարությամբ` հերքելով մի շարք բանկերում Պողոսյանի և նրա անվան հետ կապվող ընկերությունների անունով հաշվեհամար ունենալու հանգամանքը, և հայտնեց, որ խոսք չի կարող լինել Պողոսյանի կողմից ձեռնարկատիրական գործունեությամբ զբաղվելու մասին: Նշենք, որ այս գործի շրջանակներում մինչ այս պահը որպես կասկածյալ կամ մեղադրյալ ներգրավված անձ կամ անձինք չկան: Նկատենք, որ պաշտոնաթողությունից հետո Միհրան Պողոսյանը Yerkir.am-ի տեղեկություններով՝ պատրաստվում է առաջիկա խորհրդարանական ընտրություններին՝ ակնկալիքով, որ ինչ-որ պաշտոնի կրկին կվերադառնա: Ըստ որոշ լուրերի՝ նա պատգամավոր դառնալու ցանկություն ունի:

Նշենք, որ Միհրան Պողոսյանի անվան հետ է կապված «Ֆրեշ» սուպերմարկետների ցանցը, Ծաղկաձորի «Կեչառիս» հյուրանոցային համալիրը, «Քեթրին գրուպ» ընկերությունը, «Кавказская пленница» ռեստորանների ցանցը: Նրան է պատկանում Հայաստան՝ բանանի ներկրման մենաշնորհը: