Թուրքիայից Հայաստան փախած կովին հանձնել են բանակցությունների արդյունքում. Haberler

Կարսի կողմից, գետը մտնելով, հայ-թուրքական սահմանը հատած և Հայաստան անցած կովը համապատասխան արձանագրություն կազմելուց հետո հանձնվել է թուրքական կողմին:

Ըստ Haberler կայքի` հունիսի 29-ին թուրքական Հալիմջամ գյուղի հովիվը կովերը տարել է արածեցնելու: Հովիվն ուժեղ հարվածել է կովերից , որը մտել է գետն ու անցել հայ-թուրքական սահմանը:

Կայքը նշում է, որ խեղդվող կովին փրկելու համար հայ զինվորները ցատկել են ջուրը, ապա կենդանուն տարել իրենց կողմը: Հովիվը դեպքի մասին անմիջապես հայտնել է կովի տիրոջը` Էնգին Քարադաղին, ով այդ հարցով դիմել է գյուղապետարան: Գյուղապետը կովը վերադարձնելու համար կապ է հաստատել Հայաստանի սահմանապահ պաշտոնյաների հետ:

Կայքը հայտնում է, որ բանակցություններից հետո հայ զինվորները կովին բերել են գետի մոտ, սակայն կենդանին համառորեն չի անցել գետը: Հայ զինվորները կովի վզին գցված պարանը նետել են դեպի թուրքական կողմը, որ տերը կենդանուն կարողանա իր կողմը քաշել:

Կովի տերն ավելի ուշ ասել է. «Կովս չոբանի բռնության պատճառով է անցնում սահմանը: Երբ անցած օրն իմացա կատարվածի մասին, դիմեցի քաղաքապետին, և նա բանակցությունների արդյունքում պահանջեց կովը վերադարձնել: Երեք օր անց ստացա կովս, ինչի համար շատ ուրախ եմ»: