Թուրքերը վախենում են, որ Դոնբասից հետո Պուտինը Թուրքիայից կպահանջի Կարսն ու Արդահանը. Haberler

Թուրքական Haberler կայքը անդրադարձել է փետրվարի 21-ին ՌԴ նախագահ Վլադիմիր Պուտինի կողմից ինքնահռչակ Դոնեցկի և Լուգանսկի հանրապետությունների անկախության ճանաչումից հետո թուրքական հասարակության շրջանում սկիզբ առած վախերին, ըստ որոնց՝ Ուկրաինայից հետո Պուտինը պահանջներ կներկայացնի նաև Թուրքիային՝ հայկական պատմական Կարս և Արդահան շրջանների առումով:

Այսպես, թուրքական կայքի համաձայն, Կարս, Արդահան, Արդվին և Բաթում շրջանները ռուսական պետությանն էին այցել 1877-78 թթ. ռուս-թուրքական պատերազմից (թուրքերեն 93 Harbi` 93-ի պատերազմ, ըստ իսլամական հիջրայի` 1293 թ.) հետո` Բեռլինի վեհաժողովի արդյունքներով:

Նշվում է, որ այդ շրջանները թուրքական վերահսկողության տակ են անցել ռուս/բոլշևիկյան-թուրքական հակահայկական Մոսկվայի պայմանագրով 1921 թ. մարտի 16-ին:

Պուտինի հայտարարությունից հետո Արդահան բառը դարձել է TT (թվիթերյան թրենդ): Նման մեկնաբանություններից են`  

• «Տեր կանգնենք Կարսին և Արդահանին: Պուտինն այստեղ էլ է աչք դնելու»

• Ո՞վ կարող է երաշխավորել, որ Պուտինի` այսօր Ուկրաինայի վերաբերյալ ասվածները վաղը Կարս-Արդահանի և նեղուցների համար չեն ասվելու. եթե Պուտինը չկանգնեցվի Ուկրաինայում, հերթը մերն է:

• Բոլշևիկները Դոնբասն Ուկրիանային տվեցին, այն ռուսական հող էր՝ ըստ ամենայնի: Այդ տրամաբանությամբ ռուսները կարող են Կարսն ու Արդահանը պահանջել:

• Սրա վերջը լավ չի լինի: 20 կամ 50 տարի հետո, Կարս-Արդահան ասելով, մեր դեմ հանդես կգան: