Ազատ արձակել բոլոր բերման ենթարկվածներին. ՀՅԴ

Հայ Յեղափոխական Դաշնակցությունը հայտարարություն է տարածել Բաղրամյան պողոտայում այսօր ցուցարարներին ցրելու միջադեպի կապակցությամբ։ 

«Վերջին օրերին  Հայաստանի  քաղաքացիական հասարակության ներկայացուցիչները   կազմակերպեցին բողոքի գործողություններ,  պահանջելով  չեղյալ հայտարարել   էլեկտրաէներգիայի սակագնի թանկացման որոշումը: Ըստ էության  բնակչության մեծամասնության  ցանկությունն արտահայտող այս գործընթացը անցանկալի շարունակություն ունեցավ: Հունիսի 23-ին ոստիկանությունը  ցրեց  ցույցը: Ծեծի ենթարկվեցին եւ բերման ենթարկվեցին ցուցարարներ, իրադարձությունները լուսաբանող լրատվամիջոցների ներկայացուցիչներ: Տեղի ունեցածի հետեւանքով ոչ միայն տուժեցին տասնյակ քաղաքացիներ, եւ իրենց մասնագիտական պարտականությունը կատարող լրագրողներ, այլեւ տուժեց երկրի վարկը, կրկին անգամ  խաթարվեց   հասարակական հանդուրժողականության մթնոլորտը:  

Ստեղծված իրավիճակը հաղթահարելու և լարվածության  հետագա խորացումից խուսափելու նպատակով  պահանջում ենք՝  որպես առաջնահերթ  քայլ ազատ արձակել բոլոր բերման ենթարկվածներին: Անհրաժեշտ է   առանձին քննության նյութ դարձնել  ոստիկանության կողմից անհամաչափ ուժի կիրառման յուրաքանչյուր դեպք:

Իշխանությունները պարտավոր են կատարվածի հետ կապված հետագա գործողությունները իրականացնել լիարժեք հրապարակայնության պայմաններում, ինչպես եւ քննության նյութ դարձնել հասարակայնության ներկայացուցիչների  արդարացի պահանջները:

 Միաժամանակ  կոչ ենք անում բոլորին  ձեռնպահ մնալ  լարվածության  հետագա սրմանը, հասարակության պառակտմանը, երկրի վարկին  ու հեղինակությանը հարվածող եւ  հավանական միջամտությունների առիթ  տվող  գործողություններից»: 

ՀՅԴ Մամլո դիվան