Գալուստ Սահակյանը համոզում է պատգամավորներին՝ ընդունել թանկացումների հանգեցնող օրենքը

Այսօր ԱԺ արտահերթ նիստում քվեարկության դրվեց «Ակցիզային հարկի մասին» օրենքում փոփոխություններ ու լրացումներ անելու մասին հարցը:

Վարման կարգով ելույթ ունեցավ ԲՀԿ խմբակցության պատգամավոր Միքայել Մելքումյանը: «ԲՀԿ-ն գտնում է, որ այս լարված ժամանակահատվածում սպառողական շուկայում նոր ցնցումներ առաջացնելը տեղին չէ ազգաբնակչության համար, գտնում ենք, որ պետք է դեմ քվեարկել»:

ԱԺ նախագահ Գալուստ Սահակյանը արձագանքեց. «Մենք էլ ենք գտնում, բայց ես հայտարարեցի, որ երկրորդ ընթերցումը կքննարկենք աշնանը»:

ԲՀԿ խմբակցության պատգամավոր Տիգրան Ուրիխանյանը նշեց. «Խոր հավատ տածելու պարագայում չի կարելի անգամ մինչև երկրորդ ընթերցում թողել, քանի որ այն կործանարար է, այս օրենքին դեմ պետք է քվեարկել»:

ԱԺ նախագահը պնդեց հակառակը. «Ոչինչ կործանարար չի կարող լինել, որովհետև մենք ունեն ժամանակ այն քննարկելու»:

ՕԵԿ խմբակցության ղեկավար Հեղինե Բիշարյանն էլ նշեց. «Բազմաթիվ թանկացումների պարագայում չկա որևէ պատճառ առաջին ընթերցմամբ այս օրենքը ընդունելու, եթե կա ժամանակ` քննարկելու այդ օրենքը, հորդորում ենք` մի\' արեք, մի\' քվեարկեք»:

Գալուստ Սահակյանը կրկին փորձեց համոզել. «Քաղաքական մեծամասնությունն իր պատասխանատվության շրջանակներում կարող է քվեարկել: Քաղաքական մեծամասնությունը տեսնում է, որ հիմավորումների լրացուցիչ պահանջարկ կա, թող առաջին ընթերցումն անցնի, հետո կքննարկենք աշնանը»:

ՕԵԿ-ական Հովհաննես Մարգարյանը նշեց, որ աննախադեպ է, որ այս օրենքին բոլորը դեմ են, նա հորդորեց թողնել քվեարկությունը, որ օրենքը հանձնաժողովներում քննարկվի ու հղկվի:

Գալուստ Սահակյանն արձագանքեց` ասելով, որ չի կարող իրեն թույլ տալ հայտարարել, թե իր համար օրենքը լիովին անընդունելի է:

ՕԵԿ-ը քսան րոպե ընդմիջում վերցրեց, որպեսզի քաղաքական խմբակցությունները քննարկեն, որոշեն` ինչ անել:

«Պարո\'ն Սահակյան, մենք Ձեզ շատ հարգում ենք, բայց երեկ մեզ թվաց, թե Դուք դեմ եք այս օրենքին, իսկ հիմա պահում եք Ձեր քաղաքական գիծը` փորձելով աջակցել կառավարության ձեր գործընկերներին ու առաջին ընթերցմամբ անցկացնել օրենքը»,- ասաց Բիշարյանը:

Գալուստ Սահակյանը հեգնեց. «Դուք հերոս եք, քսան րոպե ընդմիջում»: