Մենք բաց ձևաչափով վեր ենք հանում կոնֆլիկտը. Արմեն Ռուստամյան

Արդեն տեղեկացրել ենք, որ այսօր տեղի է ունեցել Սոցիալիստական ինտերնացիոնալի ԱՊՀ-ի, Կովկասի և Սև ծովի հանձնախմբի ժողովը:

ՀՅԴ-ի կողմից հյուրընկալվող հանձնախմբի ժողովին մասնակցելու համար Երևանում են սոցիալիստական և սոցիալ-դեմոկրատական կուսակցությունների ներկայացուցիչներ Ռուսաստանից, Ուկրաինայից, Վրաստանից, Ղազախստանից, Բելառուսից, Մոլդովայից, Հունգարիայից, Ղրղզստանից, ինչպես նաև Ադրբեջանից։ 

Հանձնաժողովի հայաստանյան ներկայացուցիչ Արմեն Ռուստամյանը համաժողովից հետո լրագրողների հետ զրույցում նշեց. «Ես ուզում եմ ընդգծել հանձնաժողովի դերը: Շատ յուրահատուկ ձևաչափ է սա: Մենք բաց ձևաչափով վեր ենք հանում կոնֆլիկտը: Մասնավորապես` Հարավային Կովկասի բոլոր երկրների սոցիալիստական կուսակցությունների ներկայացուցիչներն այս հարթակում հանդիպում են և քննարկում բոլորին հուզող խնդիրները: Այս հանձնաժողովը բավական կենսունակ է և կարողանում է իր ուրույն դերակատարումն ունենալ»:

Անդրադառնալով ադրբեջանցի ներկայացուցչի դիրքորոշմանը` նա ասաց. «Մենք իսկապես այստեղ փորձում ենք հասնել համախոհության: Մեր հիմնական նպատակը փոխադարձ ըմբռնման հասնել է: Պետք է ամեն ինչ անել, որ ժողովրդավարության ներդրման միջոցով հասնենք փոխհամաձայնության: Ադրբեջանի մեր կոլեգաներն էլ են ընդունել այս սկզբունքները: Մենք բացառել ենք պատերազմի միջոցով հարցերի կարգավորումը»: