Միքայել Մինասյանի եղբայրը` ՀՀԿ ցուցակում ընդգրկվելու եւ իր ցանկությունների մասին

Yerkir.am-ն արդեն տեղեկացրել է, որ Երեւանի ավագանու առաջիկա ընտրություններում ՀՀԿ համամասնական ցուցակի 13-րդ հորիզոնականը զբաղեցնում է Միքայել Մինասյանի կրտսեր եղբայրը` Գրիգոր Մինասյանը: 30-ամյա երիտասարդը «Էյ Էմ» իրավաբանական ընկերության կառավարիչ-բաժնետերն է, իրավաբանական գիտությունների թեկնածու, Հայաստանի փաստաբանների պալատի անդամ: Նա պատասխանել է Yerkir.am-ի հարցերին:

- Պարո'ն Մինասյան, վաղո՞ւց եք համալրել ՀՀԿ-ի շարքերը եւ ինչո՞ւ որոշեցիք անդամակցել հենց այդ կուսակցությանը:

- ՀՀԿ անդամ եմ 2012թ.-ից, իսկ որոշումս պայմանավորված է նրանով, որ մեր ընտանիքին հարազատ կուսակցություն է ՀՀԿ-ն: Հայրս էլ է ՀՀԿ անդամ, եւ հենց նրա շնորհիվ ծանոթացել եւ շփվել եմ շատ հանրապետականների հետ, այն լավ, պարզ մարդկանց հետ, եւ գուցե հենց դա է պատճառը, որ ընտրել եմ հենց այդ կուսակցությունը: ՀՀԿ-ն մեր ընտանիքի համար ավանդական կուսակցություն է:

- Սա՞ է միայն պատճառը, շարժառիթը: Իսկ կուսակցության գաղափարախոսությունը կամ այլ արժեքներ...

- Գաղափարախոսությունը միանշանակ կարեւոր է, դա էլ է պատճառներից մեկը, որ ընտրել եմ ՀՀԿ-ն: Նորից ուզում եմ կրկնել, որ ՀՀԿ-ն մեր ընտանիքի համար ավանդական կուսակցություն է:

- Ենթադրում եմ ՀՀԿ-ին անդամակցելու Ձեր որոշման մեջ դեր է խաղացել նաեւ Ձեր եղբայրը` Միքայել Մինասյանը:

- Գիտեք, չեմ ցանկանում որեւէ ձեւով քննարկել կամ մեկնաբանել եղբորս եւ նրա գործունեությունն` առհասարակ:

- Բայց ամեն դեպքում ուզում եմ հարցնել` Միքայել Մինասյանի եղբայրը լինելու հանգամանքը Ձեզ օգնո՞ւմ, թե՞ խանգարում է:

- Նորից եմ ասում` որեւէ ձեւով ցանկություն չունեմ ո'չ քննարկել, ո'չ մեկնաբանել, ո'չ էլ գնահատել եղբորս եւ նրա գործունեությունը:

-Լավ, վերադառնանք Երեւանի ավագանու ընտրություններում ՀՀԿ համամասնական ցուցակին: Ձեր` ցուցակում ընդգրկվելու որոշումն ինչպե՞ս կայացվեց, Դուք եք ցանկացել, թե Ձեզ ցուցակում ներառել են, հետո նոր` տեղեկացրել:

- Բնականաբար, ես ցանկացել եմ, եւ բնականաբար, դա կուսակցության որոշումն է, ինչի համար շատ շնորհակալ եմ եւ հուսամ, որ ինձ ընձեռված հնարավորությունը կիրականացնեմ եւ կարդարացնեմ կուսակցության սպասելիքները:

- Այսինքն` նախ Դուք եք ցանկություն հայտնել, հետո Ձեր ցանկությունն ի գիտություն է ընդունվել:

- Իհարկե:

- Ուշագրավ է, որ երբ օրեր առաջ փորձում էինք պաշտոնապես տեղեկատվություն ստանալ, որ Դուք Արա Մինասյանի որդին եք, Միքայել Մինասյանի եղբայրը, մի շարք կարկառուն ՀՀԿ-ականներ, բառի բուն իմաստով, խուսափում էին պատասխանել այս հարցին, լավագույն դեպքում ասում էին, որ Դուք Արա Մինասյանի որդին եք: Ձեզ չե՞ն ճանաչում, չգիտեի՞ն, թե ով է ՀՀԿ համամասնական ցուցակի 13-րդ համարը զբաղեցնող անձնավորությունը, թե՞ ինչ-որ այլ պատճառ կա:

- Չեմ կարծում, որ տեղյակ չեն եղել: Չեմ կարծում խուսափելու առիթ կա` ասելու համար, որ ես, այո, Միքայել Մինասյանի եղբայրն եմ: Բնական է, որ եթե Արա Մինասյանի որդին եմ, ուրեմն ես եւ Միաքայել Մինասյանը եղբայրներ ենք:

- Գուցե վախենում են արտաբերել Միքայել Մինասյան անուն-ազգանունը:

- Դուք ինձ նորից դրդում եք (ծիծաղում է), որ ես անդրադառնամ իմ եղբորը, բայց ես չեմ մեկնաբանի:

- Լավ, Դուք ցանկանում եք ընդգրկվել Երեւանի ապագա ավագանու կազմում: Կարծում եմ` Դուք բավականին մեծ հնարավորությունների տեր անձնավորություն եք, ի՞նչն էր Ձեզ մինչ այժմ խանգարում անել որեւէ լավ գործ, որ չէիք կարողանում անել եւ հիմա, ավագանու կազմում ընդգրկվելով, ցանկանում եք այդ բացը լրացնել, այսինքն, լավ իմաստով, Ձեր ուզածն անել:

-Ես աշխատել եմ ե'ւ գիտական ոլորտում, ե'ւ պետական ոլորտում, այժմ մասնավոր սեկտորում եմ, այսինքն` պետական կառույցների հետ կապված գաղափարներ ունենալով` չեմ կարող դրանք իրականացնել: Իսկ ինչ վերաբերում է ավագանուն, ունեմ գաղափարներ, ծրագրեր, որոնք ներկայացնելու եմ ավագանու ՀՀԿ-ական խմբակցությանը, կարծում եմ` իմ այդ ծրագրերը համահունչ են ՀՀԿ կուսակցության` Երեւանի զարգացման ծրագրին: Եվ իմ փորձը, որը ձեռք եմ բերել, մասնավոր սեկտորում աշխատելով, այսինքն` հենց նույն քաղաքապետարանի հետ բազմաթիվ իրավահարաբերությունների մեջ մտնելով, պաշտպանելով մեր հաճախորդների շահերը, տեսել եմ որոշակի խնդիրներ եւ կարծում եմ, որ իմ մասնագիտական կարողությունները եւ այդ ձեռք բերած փորձը կարող եմ կիրառել:

- Երեւանցիների շահե՞րն եք պաշտպանելու` իրավաբանական տեսանկյունից:

- Երեւանցի-քաղաքապետարան փոխհարաբերություններին շատ լավ տեղյակ եմ եւ կարծում եմ, որ կարող եմ օգուտ տալ իմ կուսակցությանը, ավագանու մեր խմբակցությանը` խնդիրները ներսից ցույց տալու համար, եւ իմ մասնագիտական գիտելիքներով նպաստեմ Երեւանն ավելի լավը դարձնելուն:

- Պարո'ն Մինասյան, մեր քաղաքական գործիչներից շատերը եւ պարզապես քաղաքացիներ պնդում են, որ մեր հայրենակիցները հիմա ավելի շատ արտագաղթում են ոչ այնքան սոցիալական խնդիրների պատճառով, որքան` արդարության պակասի: Համամի՞տ եք այս տեսակետին:

- Արտագաղթի պատճառները շատ են, որոնց թվում է արդարության խնդիրը, տնտեսական խնդիրներ, նաեւ շատ դեպքերում մարդկանց` ավելի լավ ապրելու ցանկությունը: Արդարության խնդիր, իհարկե, կա մեր երկրում, այդ խնդիրը լուծողը դատական համակարգն է: Եթե համեմատեք 3-4 տարի առաջվա դատարանը այսօրվա դատարանի հետ, իհարկե, ակնհայտ պրոգրես կա: Արդարության խնդիր կա, չհամաձայնել այդ մտքի հետ, պարզապես չի կարելի, բայց պետք է նշեմ նաեւ, որ այդ խնդիրները տեսնում են այսօրվա իշխանությունները եւ ամեն ինչ անում են, որ այդ խնդիրները լուծվեն:

- Այսինքն` մարդիկ այսօր վստահո՞ւմ են դատարաններին, դատական համակարգին:

- Ավելի շատ, քան 4 տարի առաջ:

-Լավ, իսկ, Ձեր կարծիքով, ինչո՞ւ է մեծանում արտագաղթողների թիվը, աղքատությունն ինչո՞ւ է աճում: Ո՞րն է խնդիրը:

- Անկեղծ ասած` ծավալների մեծացման կամ փոքրացման հետ կապված տեղեկատվություն չունեմ, բայց արդեն ասացի, որ մարդիկ մի քանի հանգամանքների պատճառով են արտագաղթում: Միանշանակ, եթե մարդ մի տեղից տեղափոխվում է իրեն անծանոթ մեկ այլ վայր, շատ քիչ դեպքերում է, որ լավ կյանքից է, այսինքն` դժգոհություն կա:

- Այսօր իշխանությունից դժգոհ մարդկանց թիվը, կարծես, շատ է: Օրինակ` նախագահական ընտրությունների ժամանակ Րաֆֆի Հովհաննիսյանի հավաքած 37 տոկոս ձայները շատերը, անգամ` իշխանությունները, համարում են իշխանություններից դժգոհ հատվածի ձայներ...

- Գիտեք, ես իմ քաղաքական կարիերայի ամենաառաջին քայլերն եմ կատարում, դրա համար նման քաղաքական գնահատականներ կխուսափեմ տալ: Կարող եմ խոսել արդարադատության համակարգի մասին, վստահորեն ասել, որ պրոգրես կա, իհարկե, շատ դանդաղ, բայց արդյունքը տեսանելի է: Իսկ ինչ վերաբերում է մնացած հարցերին, թույլ տվեք գոնե մտնել քաղաքականության մեջ, հետո մեկնաբանել:

- Դուք անընդհատ ասում եք, որ պրոգրես կա, բայց, շատերի կարծիքով, դատական համակարգն իշխանության կցորդն է, դատարաններն անում են այն, ինչ կորոշի իշխանությունը, օրինակ` Օսկանյանի` փողերի լվացման գործի կապակցությամբ շատերը պնդում էին, որ դա քաղաքական պատվեր է:

- Կարող եմ ասել, որ եթե 4-5 տարի առաջ դատական համակարգը սերտաճած էր պետական իշխանության, գործադիր իշխանության, նույնիսկ` օրենսդիր իշխանության հետ, այսինքն` բոլորը փոխկապակցված էին, չկար իշխանության տարանջատման սկզբունքին համահունչ առանձին դատական իշխանության մարմին: Այսօր ունենք շատ ավելի անկախ դատական համակարգ: Այլ հարց է, որ այդ անկախ դատական համակարգն իր ինքնակառավարման մարմինների միջոցով դեռ շատ անելիքներ ունի եւ այնքան արդյունավետ չի աշխատում, ինչպես որ պետք է աշխատի:

-Վերադառնանք ավագանու ընտրություններին. ինչպե՞ս կգնահատեք դեռ գործող ավագանու աշխատանքը, ի՞նչ է արել այս ավագանին:

- Բազմաթիվ խնդիրներ է լուծել, օրինակ` քաղաքաշինության ոլորտում, վթարային շենքերի հարցում, ավելի բարեկարգ է դարձել Երեւանը, զբոսաշրջիկների համար ավելի ընկալելի եւ հարմարավետ քաղաք է դարձել: Գործ արվել է, եւ կարծում եմ, որ կունենանք ավելի լավ Երեւան:

- Համամիտ չե՞ք, որ իրականում ավագանին այդքան էլ որոշում կայացնող մարմին չէ եւ անում է այն, ինչ որոշում է տվյալ օրվա իշխանությունը, քաղաքապետը: Այսքան ժամանակ չեղավ մի դեպք, որ երբ քաղաքապետը որեւէ սխալ է թույլ տալիս, ավագանին ասի` պարո'ն քաղաքապետ, Դուք սխալ եք անում: Օրինակ` Մաշտոցի պուրակի հայտնի պատմության ժամանակ ավագանին որեւէ քայլ չձեռնարկեց:

- Գործող ավագանին աշխատում եւ տալիս է արդյունքներ, թեկուզ` նույն Ձեր մատնանշած պուրակի հետ կապված:

- Պարո'ն Մինասյան, բայց Մաշտոցի պուրակի դեպքում հարցը միայն լուծվեց այն ժամանակ, երբ երկրի նախագահը գնաց եւ քաղաքապետին մատնացույց արեց, որ սիրուն չի:

- Գիտեք, միանշանակ չէի ցանկանա գնահատական տալ, գուցե հենց ավագանին է աշխատանքներ տարել եւ աշխատել նույն այդ հասարակական կազմակերպությունների հետ, համագործակցել, եւ ստացվել է դրական լուծում: Թե ինչ եղանակով է այդ դրական լուծումը ստացվում... Ի վերջո, պրոցեսն այնքան կարեւոր չէ, որքան արդյունքը: Իսկ Ձեր վկայակոչած դեպքի առիթով կարող եմ ասել, որ արդյունքը շատ լավն է:

- Ուզում եմ ասել, որ ավագանու որոշումներն ինքնուրույն չեն կայացվում:

- Այնտեղ աշխատում են մարդիկ, ովքեր ունեն իրենց կարծիքը եւ քվեարկում են իրենց խղճին համահունչ:

-Իսկ ինչո՞վ կտարբերվի այս ավագանին նախորդից:

- Յուրաքանչյուր նորը բերում է ավելի լավը: Կկարծում եմ, որ ավելի լավ պետք է աշխատենք:

-Այսինքն` հույս ունեք, որ էական որոշումներ կկայացնեք, լուրջ գործեր կյանքի կկոչեք:

- Հավատում եմ դրան:

- Էդուարդ Շարմազանովը հայտարարել է, որ Տարոն Մարգարյանը Երեւանի վերջին 20 տարիների լավագույն քաղաքապետն է, Դուք է՞լ եք այդ կարծիքին:

- Տարոն Մարգարյանը շատ աշխատասեր եւ բանիմաց քաղաքապետ է, ներսից տեղյակ է բոլոր խնդիրներին: Կարծում եմ` շատ լավ է աշխատել եւ երեւանցիները պետք է հնարավորություն տան, որ նույն տեմպով կիսատ թողած գործերն ավարտին հասցնի: Տարոն Մարգարյանն իսկական պրոֆեսիոնալ է, Երեւանը պետք է ունենա վերընտրված եւ ոչ թե նորընտիր քաղաքապետ: Տարոն Մարգարյանը վերջին 20 տարվա ամենաաշխատասեր եւ ամենապրոֆեսիոնալ քաղաքապետն է:

- Չե՞ք կարծում, որ նման գնահատականներով դուք` ՀՀԿ-ականներդ, վիրավորում եք ՀՀԿ-ական նախկին քաղաքապետերին, թերագնահատում նրանց աշխատանքը:

-Կարծում եմ` ամեն նոր պաշտոնյա պետք է եւ պարտավոր է լինի ավելի լավը, քան իր նախորդը: Ե'վ նախորդները, ե'ւ կուսակցությունը պետք է ուրախանան, որ ամեն նորն ավելի լավն է:

- Եվ ո՞րն է լավագույն քաղաքապետ Տարոն Մարգարյանի ձեռքբերումը:

-Ձեռքբերումները շատ են` Երեւանի բարեկարգումը, պուրակների բարեկարգումը, ճանապարհաշինությունը, բազմաթիվ վթարային շենքերի հարցերի լուծումը: Մոտ 2000 վթարային բնակարան վերակառուցվել եւ հանձնվել է բնակիչներին:

- Պարո'ն Մինասյան, գիտեմ, որ Ձեր պապը` Գրիգոր Հասրաթյանը, 13 տարի եղել է Երեւանի քաղաքապետ: Հնարավո՞ր է` մի օր շարունակեք նրա գործը:

- Ես նոր եմ սկսում իմ քաղաքական կարիերան եւ նման հավակնությունների մասին խոսելը դեռ շատ վաղ է: Թույլ տվեք գոնե մտնել ավագանու կազմ եւ նոր պատասխանել Ձեր այդ հավակնոտ հարցին (ծիծաղում է) :

-Ի դեպ, ցուցակում 13-րդ հորիզոնականում եք: Ասում են` 13 թիվը լավ թիվ չէ:

-13 թվի հետ կապված` որեւէ բարդույթ չունեմ, կարծում եմ` իսկական քրիստոնյան չպետք է հավատա նման բաների:

Զրուցեց Ագնեսա ԽԱՄՈՅԱՆԸ