Լիսկան ծեծված տղայի հետ «զրուցել է» իր պանսիոնատում. նոր մանրամասներ

Սյունիքի մարզպետ Սուրիկ Խաչատրյանը Գորիսի հերթական աղմկոտ միջադեպից հետո ընդհատակ է անցել: Նա բացարձակապես հեռախոսազանգերի չի պատասխանում: Սակայն գնալով թեժանում են միջադեպին նրա որդու և եղբորորդիների մասնակցության մասին լուրերը: Yerkir.am-ին նոր մանրամասներ են հայտնի դարձել Սուրիկ Խաչատրյանի և տուժած տղաներից մեկի, այսպես ասած, հանդիպման մասին:

Մեր տեղեկություններով՝ Սուրիկ Խաչատրյանը քաջատեղյակ է եղել դեպքին և Երևանից շտապ ժամանել է «դեպքի վայր»: Ծեծված տղաներից Մուշեղին բերել են Գորիսի Սդղի գյոլի տարածքում գտնվող` Սուրիկ Խաչատրյանին պատկանող պանսիոնատը, որտեղ և կայացել է «զրույցը»: Այդ ընթացքում դաժան ծեծի ենթարկված Հարությունն անօգնական ընկած է եղել, նրան օգնության է հասել հորեղբոր որդին և, 100 մ քարշ տալով, հազիվ կարողացել է տեղափոխել հիվանդանոց:

Ի դեպ, ասում են` Սդղի գյոլ կոչվող տարածքը Սուրիկ Խաչատրյանի համախոհների մշտական «ռազբորկաների» վայրն է: Շրջանառվող տեղեկությունների համաձայն` դեպքից հետո Սուրիկ Խաչատրյանը հրահանգել է խմբի տղաներին՝ Զաքարյան եղբայրների դեմ ցուցմունք տալ, թե իբր նրանք են հրահրել վեճը, սակայն Զաքարյանները պնդում են, որ անձամբ Տիգրանն է իր բջջայինով զանգահարել տղաներին, այն էլ` մի քանի անգամ և կանչել` հաշիվ պարզելու: Զաքարյանների հարազատների խոսքով՝ քննչական մարմինն այդ հանգամանքը կարող է ստուգել Տիգրանի հեռախոսազանգերի վերծանումների միջոցով: Զաքարյանների դեմ ցուցմունք տալով` Սուրիկ Խաչատրյանի համախոհները երևի կարծել են, թե Բուդաղյաների գործի պես ողջ մեղքը կընկնի հենց տուժածների վրա, և հետագայում նրանք էլ կկանգնեն դատարանի առջև:

Սակայն, yerkir.am-ի տեղեկություններով, Զաքարյաններին այցելած քննիչը տեղեկացրել է, որ նրանց վրայից միջադեպը հրահրելու կասկածանքը հանվել է, և որ միջադեպի հանգամանքները պարզելու համար մի շարք անձինք են հարցաքննվել:

Հիշեցնենք, որ դեպքը տեղի է ունեցել մայիսի 2-ին: Դեպքից երկու օր անց մարզի դատախազության կողմից արարքին սխալ իրավական գնահատական է տրվել, և քրեական գործ է հարուցվել ոչ թե քրեական օրենսգրքի 112-րդ հոդվածի 2-րդ մասի 6-րդ կետի հատկանիշներով` դիտավորությամբ մեկ ուրիշի առողջությանը ծանր վնաս պատճառելը, որն առաջացրել է ծանր վնաս և կատարվել է մի խումբ անձանց կողմից, այլ` ՀՀ ՔՕ 258-րդ հոդվածի 3-րդ մասի 1-ին կետի հատկանիշներով՝ դիտավորությամբ հասարակական կարգը կոպիտ կերպով խախտելը, որն արտահայտվել է հասարակության նկատմամբ բացահայտ անհարգալից վերաբերմունքով: Այս հանգամանքին մանրամասն և հիմնավոր անդրադարձել ենք մեր նախորդ հրապարակման մեջ: