Խնդրել էր հորը տրակտոր գնել. նոր մանրամասներ 17-ամյա տղայի ինքնասպանության մասին

Շիրակի մարզի Ողջի գյուղի բնակիչներն ափշած են օրեր առաջ գյուղում տեղի ունեցած դեպքից: Նշենք, որ մարտի 24-ին գյուղի դպրոցի 12-րդ դասարանի աշակերտ Կարո Կիրակոսյանը թոնրատանը, առաստաղից կախվելու միջոցով, ինքնասպան էր եղել:

Yerkir.am-ի տեղեկություններով` մահացած տղան ընտանիքի կրտսերն էր, ուներ մեկ քույր և եղբայր` երկուսն էլ ամուսնացած: Ի դեպ, ավագ եղբայրն ամուսնացել է մոտ մեկ ամիս առաջ:

Գյուղապետ Հրաչիկ Մանուկյանը yerkir.am-ին պատմեց, որ գյուղում բոլորն էլ հարգանք են տածել այդ ընտանիքի նկատմամբ: Կարոյի հայրը, ինչպես գյուղի շատ տղամարդիկ, մշտապես մեկնել է արտագնա աշխատանքի: Ընտանիքն ունի  նաև փոքր տնտեսություն և գյուղատնտեսությամբ է զբաղվում: Գյուղապետի խոսքով` Կարոն դպրոցում նորմալ սովորող աշակերտ է եղել և հուլիսին պետք է գնար ծառայության:

Նա նաև նշեց, որ ծնողները հնարավորություն չեն ունեցել տղային քաղաք ուղարկելու` ուսումը շարունակելու համար:

Ըստ գյուղապետի` ընտանիքի թե’ հայրը, թե' որդիները պատշաճ վարքագիծ են ունեցել` ո'չ ծխել են, ո'չ խմել, շրջապատում հարգանք են վայելել: «Խելոք, շնորքով ընտանիք է, ամուսիններով իրար սիրող, հարգող, միշտ ջան-ղուրբան են եղել իրար հետ»,- ասաց Մանուկյանը և հավելեց,  որ Կարոն մտադրություն է ունեցել իրենց տնտեսությունը զարգացնել և դրա համար տարբեր ծրագրեր է մտածել, անգամ խնդրել է հորը` տրակտոր գնել:

Համայնքապետի խոսքով` դեպքի նախորդ օրը սովորականի պես ընտանիքով աշխատել են հողամասում, հետո վերադարձել են տուն, հաց կերել, հեռուստացույց դիտել, ապա Կարոն ասել է, թե հոգնած է և գնացել է քնելու: Առավոտյան հայրը գնացել է անասուններին կեր տալու և, մտնելով հացատուն, որդուն հայտնաբերել է կախված վիճակով:

Ըստ գյուղապետի` գյուղում աշակերտի մահվան հնարավոր վարկածների մասին որևէ խոսակցություն չկա, որովհետև նա անգամ գրություն չի թողել: Մանուկյանը նաև պատմեց, որ Կարոն սիրել է մարզվել և մշտապես լավ մարզավիճակում է եղել:

Yerkir.am-ի հետ զրույցում մահացածի ընկերներն էլ պատմեցին, որ Կարոն շատ մարդամոտ և ընկերասեր տղա է եղել:

Նշենք, որ փաստի առթիվ հարուցվել է քրեական գործ, կատարվում է նախաքննություն:

Լուսանկարը` Կարոյի սոցցանցային էջից