Խորհրդարանի ներքին կուխնյան է, թող իրենք որոշեն. Հովիկ Աբրահամյանը հակառակվեց նախարարին

Այսօր կառավարության նիստում ՀՀ արդարադատության նախարար Հովհաննես Մանուկյանը քննարկման ներկայացրեց կառավարության եզրակացությունը ԱԺ «Ժառանգություն» խմբակցության պատգամավոր Թևան Պողոսյանի օրենսդրական նախաձեռնության վերաբերյալ, որով առաջարկվում էր ԱԺ կանոնակարգ-օրենքում փոփոխություններ կատարել, մասնավորապես` կառավարությանը պատգամավորների կողմից հարցեր տալու կարգի մեջ փոփոխություններն այնպես կատարել, որ նիստի սկզբում առաջինը հնչեցվեն բանավոր հարցերը, որից հետո հնչեն գրավոր հարցրերը, և դա Թևան Պողոսյանը պատճառաբանում է նրանով, որ երբեմն գրավոր հարցերն այնքան շատ են լինում, որ բանավոր հարցերի համար ժամանակ չի մնում: Պատգամավորը նաև առաջարկում է, որ սկզբում իրենց բանավոր հարցերը տան ընդդիմադիր երկու պատգամավորներ, որից հետո` երկու անկախ պատգամավորներ:

«Պետք է արձանագրել, որ մեր երիտասարդ պառլամենտարիզմի պատմության մեջ ընդամենը մեկ դեպք է եղել, երբ գրավոր հարցերը հնչեցնելուց հետո ժամանակ չի մնացել բանավոր հարցերին»,- ասաց Հովհաննես Մանուկյանը՝ նշելով, որ պատգամավորի առաջարկությանը տրվում է բացասական եզրակացություն, և շեշտելով, որ ԱԺ կանոնակարգ-օրենքում նախատեսված կարգը ամենահաջողն է:

Վարչապետ Հովիկ Աբրահամյանը առարկեց` ասելով. «Ես կարծում եմ, որ սա կառավարության խնդիրը չէ, դա խորհրդարանի խնդիրն է: Հիմա մեզ որոշ պատգամավորներ անհիմն, անտեղի մեղադրում են, իբր մենք խուսափում ենք բանավոր հարցերից ու կազմակերպում ենք գրավոր հարցեր, բայց գրավոր հարցերին պատասխանելը կանոնակարգ-օրենքի պահանջն է, մենք պարտավոր ենք պատասխանել: Թող իրենց հարցերը չտան, մենք էլ չպատասխանենք: Իզուր ենք բացասական կարծիք տալիս, թող իրենք որոշեն՝ գրավո՞ր, թե՞ բանավոր: Փաստորեն, մենք ինչ է, վախենո՞ւմ ենք իրենց գրավոր հարցերին պատասխանել, թե՞ պատրաստ չենք: Պետք չի, որ մենք բացասական կարծիք հայտնենք»:

Հովհաննես Մանուկյանը նշեց, որ սկզբունքորեն դեմ չէ:

Վարչապեը զայրացավ. «Բա ինչի՞ ես բերել էս հարցը»:

Նախարարը փորձեց բացատրել, որ գրավոր հարցերին տրվում են ավելի հիմնավոր, վերլուծություններով հագեցած պատասխաններ, քան բանավոր հարցերին, որոնց տրվում են իրավիճակային պատասխաններ:

Վարչապետը պնդեց, որ դա պատգամավորների որոշելիք հարցն է, թող խորհրդարանը որոշի: «Դեմ եմ, որ մեր կարծիքը լինի բացասական: Իրենց ներքին կուխնյան է, թող իրենք որոշեն: Ժամ ու կես է տևում կառավարության հետ հարցուպատասխանը, կան հինգ ընդդիմադիր խմբակցություններ, և այդպես էլ պետք է լինի, որ սկզբում ընդդիմադիրները պետք է հարցեր տան»,- ասաց Հովիկ Աբրահամյանը: