Ուսուցիչներն ու տնօրեններն իրենք պետք է որոշեն՝ մնա՞լ ՀՀԿ-ի շարքերում, թե՞ ոչ. ԿԳ նախարար

Դպրոցի տնօրենները, ուսուցիչները ցուցակներով, ճնշումներով են դարձել կուսակցականներ: Այս մասին լրագրողների հետ զրույցում ասաց ՀՀ ԿԳ նախարար Արայիկ Հարությունյանը:

Նա նշեց, որ տնօրեններից բազմաթիվ դիմումներ է ստանում, որ չեն կարողանում դուրս գալ կուսակցությունից, կամ իրենց ստիպում են դուրս չգալ:

Նախարարը, դիմելով ուսուցիչներին, ասաց, որ երկրում իրավիճակ է փոխվել, և այլևս իրենք են տերն իրենց կյանքի, երկրի ու ցանկացած քայլ իրենք են որոշում՝ մնա՞լ ՀՀԿ-ի շարքերում, թե՞ ոչ: «Եթե չեն ցանկանում մնալ, հենց այսօր կարող են դիմում գրել ու դուրս գալ, որևէ տնօրեն, որևէ մարզպետ կամ քաղաքապետ չի կարող ազդեցություն ունենալ»,- ասաց նախարարը:

Հարցին՝  իսկ եթե նրանք ցանկանում են մնալ ՀՀԿ-ի շարքերում, ճնշումներ կլինե՞ն, նախարարը պատասխանեց` ամենևին: «Ես վերջերս որոշում եմ կայացրել կուսակցական մի տնօրենի վերանշանակման վերաբերյալ: Եթե այդ մարդը կուսակցական գործունեությամբ չի զբաղվում դպրոցում, ես իրավունք չունեմ խախտելու Սահմանադրությունը, քանի որ այնտեղ նշված է՝ յուրաքանչյուր ոք կարող է լինել այս կամ այն կուսակցության անդամ: Ինքս էլ կուսակցական եմ»,- ասաց նա: