Պոլսում Հայոց ցեղասպանության 100-րդ տարելիցը ոգեկոչող 6 մարդ է ձերբակալվել

Ապրիլի 26-ին Կ.Պոլսում ընդդիմադիր քրդամետ Ժողովուրդների դեմոկրատական կուսակցության նախաձեռնությամբ կազմակերպված՝ Հայոց ցեղասպանության 100-րդ տարելիցի ոգեկոչման միջոցառման ժամանակ ոստիկանները հարձակվել են ներկաների վրա. տեղեկացնում է «Ակօս»-ը:

Ոստիկանները ցանկացել են հանել պաստառները, որոնց վրա գրված է եղել «Առերեսվում ենք Ցեղասպանության հետ»: Ներկաները դիմադրել են ոստիկաններին: Ձերբակալվել է 6 մարդ, որոնցից երկուսը վիրավոր են:

Ոստիկանների հարձակումից հետո խումբը հավաքվել է  Սուրբ Թագավոր եկեղեցու առջև և միասնական հայտարարությամբ հանդես եկել: Նրանց թվում են եղել 2011 թվականի ապրիլի 24-ին սպանված հայ զինծառայող Սևակ Բալըքչըի հայրն ու մայրը:  

Կայքը տեղեկացնում է, որ ապրիլի 24-ին Իսթիքլալ փողոցում կայացած ոգեկոչման արարողության ժամանակ ևս ոստիկանները հարձակվել են, հանել պաստառները, սակայն ներկաներն իրենց երթը շարունակել են առանց պաստառների: