Փորձագետն առաջարկում է հայ միգրանտների նկատմամբ համաներում կիրառել

Լրջորեն սպասել, որ ՌԴ-ում գտնվող մեր միգրանտների վիճակը կբարելավվի, անիմաստ է: Այս կարծիքին է ժողովրդագիր, փորձագետ Ռուբեն Եգանյանը: «Գուցե մեր միգրանտների վիճակը, համեմատած ԵՏՄ-ին չանդամագրված այլ երկրների միգրանտների հետ, մի փոքր լավ լինի, սակայն էական փոփոխություն չի լինի»,- լրագրողների հետ հանդիպման ժամանակ ասաց նա:

Եգանյանը հորդորեց ՌԴ մեկնողներին՝ սպասել, քանի որ ներկայումս ՌԴ-ում տնտեսական խնդիրների և արտարժույթի տատանման պատճառով աշխատատեղերը քչացել են: Նրա  խոսքով՝ բազմաթիվ քաղաքացիներ են դիմում ՀՀ միգրացիոն ծառայություն՝ նրա միջոցով ՌԴ միգրացիոն ծառայություն դիմելու և ՌԴ մեկնելու արգելանքը հանելու խնդրանքով: Սակայն,  փորձագետի կարծիքով, լավ կլիներ ՌԴ-ն համաներում հայտարարեր և հայ միգրանտների արգելանքը հաներ:

Եգանյանը նշեց, որ չկա հստակ վիճակագրություն, թե ներկայումս քանի միգրանտ կա ՌԴ-ում և քանիսի մուտքն է արգելված ՌԴ: Ըստ նրա՝ դա պայմանավորված է նրանով, որ շատ քաղաքացիներ միգրացիայի ակտերի գրանցման գրասենյակ չեն դիմում:

Փորձագետը տեղեկացրեց, որ շուտով հանրապետությունում միգրացիայի վերաբերյալ հետազոտություն է անցկացվելու՝ պարզելու համար զգաբնակչության միգրացիոն տեղաշարժերը, պատճառները և այլն: