Վարչապետը խոստացել է ապրիլի վերջին վճարել նաիրիտցիների մեկ ամսվա աշխատավարձերը

Նաիրիտցիներն այսօր դարձյալ կառավարության շենքի առջեւ էին. գործարանի մի քանի աշխատակիցներ գնացել էին Հովիկ Աբրահամյանի հետ հանդիպման: Վարչապետն իր մոտ էր կանչել նրանց՝ խոստանալով չվճարված աշխատավարձերի մարման կոնկրետ ժամկետներ նշել:

Շուրջ մեկ ժամ տևած բանակցություններից հետո վարչապետի հետ հանդիպման գնացած 5 աշխատակիցներն իջան կառավարության շենքի բակ և իրենց գործընկերներին ներկայացրեցին արդյունքները: Վարչապետը խոստացել է ապրիլի 26-ին և 27-ին վճարել «Նաիրիտ» գործարանի աշխատակիցների մեկ ամսվա աշխատավարձերը, ինչպես նաև ամեն ինչ անել, որ երկու ամիսը մեկ հնարավոր լինի աշխատավարձերն աստիճանաբար վճարել:

Գործարանի աշխատակիցների մի մասը համաձայնեցին վարչապետի ներկայացրած պայմաններին, մյուս մասն էլ խոստացան՝ եթե ամսի 26-ին ու 27-ին չվճարվեն իրենց աշխատավարձերը, նրանք դարձյալ դուրս կգան փողոց, ցույցեր կանեն և կդիմեն կտրուկ գործողությունների:

Տեղեկացնենք նաև, որ վարչապետի հետ բանակցությունների գնացած աշխատակիցները երկու ամիս ցույցեր չանելու պայմանավորվածություն են ձեռք բերել: Այս պայմանավորվածությանը դեմ արտահայտվեցին գործարանի մի քանի աշխատակիցներ: