The Guardian պարբերականը հավաքում է Ցեղասպանությունը վերապրածների պատմությունները

Բրիտանական հեղինակավոր The Guardian պարբերականը ողջունելի քայլ է կատարել՝  սկսել  է հավաքել Հայոց ցեղասպանությունը վերապրածների կամ նրանց ժառանգների պատմությունները:

Այդ կապակցությամբ թերթը գրել է. «Հայոց ցեղասպանության 100-րդ տարելիցի միջոցառումների նախապատրաստական աշխատանքներն ընթանում են: Պատմական գնահատումների համաձայն՝ 1.5 միլիոն մարդ է զոհվել օսմանյան ուժերի՝ պետականորեն կազմակերպված բռնության արդյունքում, այնտեղ, ուր նախկինում եղել է արևելյան Թուրքիան»:

Կայքը, նշելով, որ կոտորածի արդյունքում հարյուրհազարավոր հայեր տեղահան են արվել, և որ վերջին տարիներին Թուրքիայի կառավարությունը այդ տառապանքները ճանաչելու քայլեր է ձեռնարկել, սակայն Հայաստանը դարձյալ մեղադրել է թուրքերին փաստերն անտեսելու մեջ, գրել է. «Կիրակի Վատիկանում մատուցված հատուկ պատարագի ընթացքում Հռոմի Ֆրանցիսկոս պապն այդ կոտորածն անվանել է 20-րդ դարի առաջին ցեղասպանությունը: Ուղերձ, որը Թուրքիայի կողմից ընդունվել է որպես «մեծ հիասթափություն և  տխրություն»:

«Եթե Դուք Հայաստանից կամ Հայկական սփյուռքից եք կամ ապրում եք արտասահմանում, մենք ուզում ենք լսել Ձեր պատմությունները, թե ինչպես է Ցեղասպանությունը ձևավորել՝ Ձեր ընտանիքի պատմությունը»,- գրում է թերթը՝ թվելով մի շարք հարցեր, օրինակ՝

1.      Ունե՞ք նամակներ, լուսանկարներ այդ ժամանակվանից:

2.      Արդյոք Ձեր ընտանիքը փախե՞լ է և ինչպե՞ս է դա ազդել Ձեր այսօրվա կյանքի վրա:

Թերթը նաև հայտնում է, որ կցանկանար լսել, թե տվյալ անձն ինչպես է ոգեկոչելու տարելիցը եւ արդյո՞ք ինչ-որ հատուկ բան անում է՝ տարելիցը նշելու համար:

Թերթն  առաջարկում է այդ պատմությունները տեղադրել իրենց կայքում ստեղծված հատուկ բաժնում կամ ուղարկել [email protected] էլեկտրոնային հասցեով: Թերթը խոստանում է դրանք օգտագործել տարելիցը լուսաբանող նյութերում: