Կարմիր խաչի ներկայացուցիչներն այցելել են ադրբեջանական կողմն անցած Անդրանիկ Գրիգորյանին

Երեկ Կարմիր խաչի միջազգային կոմիտեի Բաքվի գրասենյակի ներկայացուցիչներն այցելել են ադրբեջանական կողմն անցած պայմանագրային զինծառայող Անդրանիկ Գրիգորյանին: Այս տեղեկությունը yerkir.am-ի հետ զրույցում հաստատեց ԿԽՄԿ Երևանի գրասենյակի հաղորդակցման ծրագրերի ղեկավար Զառա Ամատունին:

Նա նշեց, որ կոմիտեի ներկայացուցիչներին հաջողվել է ընտանեկան բնույթի տեղեկատվություն փոխանցել զինծառայողին:

Հիշեցնենք, որ մարտի 22-ին՝ ժամը 13:50-ի սահմաններում, ՊԲ զինծառայող, 1991թ. ծնված շարքային-պայմանագրային Անդրանիկ Գրիգորյանը ՊԲ արևելյան ուղղությամբ տեղակայված զորամասերից մեկի մարտական դիրքից, զենք-զինամթերքը թողնելով մարտական հենակետում, անցել էր հակառակորդի կողմը: Դեպքի մանրամասները պարզելու համար կատարվում է քննություն: