Օբամային ուղղված` Հայոց ցեղասպանության մասին լավագույն շարադրության հեղինակը կպարգևատրվի 1000 դոլարով

Ամերիկայի Կալիֆոռնիա նահանգի օրենսդիրներ Ադրին Նազարյանը, Խաչո Աչաջյանն ու Սքոթ Ուիլքը Հայոց ցեղասպանության մասին շարադրությունների մրցույթ են հայտարարել. տեղեկացնում է  Asbarez-ը:

Նրանց հայտնել են, որ նախագահ Բարաք Օբամային Հայոց ցեղասպանության պատմությունը լավագույնս ներկայացրած շարադրության հեղինակը կպարգևատրվի 1000 ԱՄՆ դոլարով, իսկ երկրորդ և երրորդ տեղերը զբաղեցնողները՝ 500 և 300 դոլարով:

Մրցույթին կարող են մասնակցել Կալիֆոռնիայի ավագ դպրոցների 9-12-րդ դասարանների աշակերտները: Հաղթողները կպարգևատրվեն ապրիլի 20-ին նահանգի Կապիտոլիումի շենքում` Ցեղասպանության զոհերի հիշատակի ոգեկոչման արարողությանը մասնակցելուց հետո:

Լավագույն շարադրությունները կցուցադրվեն Կալիֆոռնիայի պետական թանգարանում: