Ինչու է Պուտինը նոր պատժամիջոցներից հետո մեկնում Եվրոպա

Այսօր կմեկնարկի ՌԴ նախագահ Վլադիմիր Պուտինի այցը Հունգարիա: Դա Պուտինի 3-րդ այցն է Եվրոպա` ուկրաինական ճգնաժամի սկսվելուց ի վեր. գրում է Газета-ն:

Պարբերականը նշում է, որ Հունգարիայի վարչապետ Վիկտոր Օրբանը միավորված Եվրոպայի քննադատներից է և բացահայտ  արտահայտում է իր համակրանքը Պուտինի հանդեպ:

Սակայն, ըստ որոշ փորձագետների, դա պայմանավորված է եվրոպական երկրների վրա ճնշում գործադրելու ցանկությամբ, և ռազմավարություն այդ այցի հետևում չկա: Այցի գլխավոր նպատակն է «Թուրքական հոսք» նախագծի քննարկումը, ինչպես նաև էներգետիկ ոլորտում համագործակցությունը:

Ըստ հունգարացի քաղաքագետ Անդրաս Ռաքսի՝ համաձայնագրերի ստորագրման համար անձամբ Պուտինի ներկայությունը պարտադիր չէ, և կողմերի համար կարևոր է ոչ թե այցի բովանդակությունը, այլ «քաղաքական նշանակությունը»:

«Այցը  երկու կողմերի համար էլ կարևոր է: Օրբանի համար դա հնարավորություն է ցույց տալ իրեն որպես անկախ քաղաքական գործիչ, իսկ Պուտինի համար՝ ցուցադրել, որ, չնայած պատժամիջոցներին, Եվրոպայի կենտրոնում կա երկիր, որտեղ նրան  ուրախությամբ պատրաստ են  ընդունել»,- նշում է հունգարացի քաղաքագետը: